Jalǵan vızamen ustalǵan otandastarymyz elge qashan oralady

ASTANA. QazAqparat – Saýd Arabııasyndaǵy konsýldyq qajylyq paryzyn óteýge baryp, vızasy jalǵan bolyp shyqqan otandastarymyzdy elge ákelý jaǵyn qarastyryp jatyr. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Búgingi derek boıynsha (3 shilde) Medınada 2 top qazaqstandyq bar. Olardyń 18-i egde jasta. 5 shildede olar Qazaqstanǵa oralady. Olar vıza boıynsha aldaǵan týrıstik kompanııany sotqa bere alady. Týrıstik vıza boıynsha 306 qazaqstandyqty qajylyqqa jibergen týrkompanııanyń ókili Saýd Arabııasynda ornalasqan jáne qazaqstandyqtarǵa kómek kórsetip jatyr», - dedi Aıbek Smadııarov vedomstvoda ótken baspasóz máslıhatynan keıin BAQ ókilderiniń saýalyna jaýap bere turyp.

Buǵan deıin SІM resmı ókili jalǵan vızamen qajylyqqa baryp, qamaýǵa alynǵan 300-den astam qazaqstandyq bosatylǵany týraly aıtqan edi.

Onyń aıtýynsha, qamaýdan bosatylǵannan keıin 100-den astam jerlesimiz birneshe avtobýspen óz betinshe ketip qalǵan. Olardan ázirge habar joq.