Jalǵan vızamen qajylyqqa baryp, qamaýǵa alynǵan 300-den astam qazaqstandyq bosatyldy – SІM

ASTANA. QazAqparat – Qajylyqqa barǵan júzdegen qazaqstandyq qamaýǵa alyndy, onyń sebebi vıza jaramsyz bolǵan. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Syrtqy ister mınıstrliginiń Djıdda qalasyndaǵy bas konsýl atyna bizdiń azamattarymyzdan Saýd Arabııasyndaǵy polıtsııa bóliminde qamaýda ekendigi týraly habar tústi. Ol boıynsha kómek kórsetildi. Ustalǵan qajylardyń barlyǵynda qajylyqqa jaramaıtyn týrıstik vıza bolǵan. Bas konsýl óz qyzmetkerlerimen birge dereý polıtsııa bólimine baryp, olardy bosatyp, qonaq úıge ornalastyrýǵa kómektesti. Keıbir málimetterge sáıkes, Saýd Arabııasynyń aýmaǵyna jalǵan vızamen 300-den astam azamat barǵan. Barlyq qajylardyń ornalasqan jerin baqylaý múmkin emes bolmaı tur. Sebebi, qamaýdan bosatylǵannan keıin 100-den astam qajy birneshe avtobýspen óz betinshe ketip qalǵan», - dedi Aıbek Smadııarov vedomstvoda ótken baspasóz máslıhatynda.

Eske salsaq, osydan birer kún buryn qajylyqqa barǵan qazaqstandyqtardyń jalǵan vızamen ustalyp, qamaýǵa alynǵany týraly habar taraǵan edi. Bolǵan jaıtqa qatysty Qazaqstan musyldary dinı basqarmasy túsinik berdi.