Jalǵan pasport alǵan adamdarǵa vaktsına aqyly bola ma

NUR-SULTAN. QazAqparat – Vaktsınalaýdyń jalǵan pasporttaryn satyp alý faktileri azaıdy. Bul týraly Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde vaktsına pasporttaryn satyp alǵan adamdarǵa amnıstııa jasaýǵa qatysty suraq qoıyldy.

«Qazirgi kezde azamattyq qoǵam osyndaı máseleni kóterip otyr. Sarapshylar onyń barlyǵyn pysyqtap jatyr. Medıtsına qyzmetkerleri tarapynan zańnamany buzý boıynsha laıyqty jaza bolýy kerek. Qazirgi kezde atalǵan zań buzýshylyqpen qatań kúres júrip jatyr. Bizde ondaı faktiler (jalǵan pasporttardy satyp alý) azaıyp keledi. Ondaı oqıǵalar boıynsha qylmystyq ister qozǵaldy. Endi azamattardy vaktsınalaýmen qamtýdyń qadamdaryn aıqyndap jatyrmyz. ıAǵnı zańnamalyq máselelerdi pysyqtap otyrmyz. Atap aıtqanda, jaýapkershilik bolýy kerek. Keıbir adamdardy ózge bireýler shatastyrýy múmkin, olar qazir ózderiniń kózqarasyn ózgertip jatyr. Azamattar vaktsınanyń paıdasyn kórip otyr», - dedi A. Tsoı.

Onyń aıtýynsha, anyqtalǵan faktiler boıynsha qylmystyq ister júrgizilip jatyr.

Baspasóz máslıhatynda tilshiler «vaktsınalaý pasporttaryn satyp alǵandar aldaǵy ýaqytta ekpeni óz qarjatyna satyp ala ma» degen suraq qoıdy.

«Bul qadamdardy aıqyndap jatyrmyz, ıaǵnı onyń formaty pysyqtalýda. Zań aıasyndaǵy máselelerdi sheshken kezde, osy qadamdardy halyqqa jarııa etemiz», - dedi mınıstr.