Jalǵan astyqty saqtaǵany úshin 95 mln teńge alǵan JShS ókildiginiń dırektory 8 jylǵa sottaldy

<p>ASTANA. KAZINFORM &ndash; Astana qalasynyń qylmystyq ister jónindegi aýdanaralyq sotynda memlekettik fýnktsııalardy oryndaýǵa teńestirilgen adamnyń qyzmet babyn paıdalana otyryp, ózine senip tapsyrylǵan bótenniń múlkin asa iri mólsherde, birneshe ret jymqyrý sondaı-aq salǵyrttyq, ıaǵnı qyzmetine adal qaramaýy saldarynan aýyr zardaptarǵa ákep soqqan qylmystyq áreketi úshin isti bolǵan &nbsp;JShS ókildiginiń dırektoryna qatysty úkim shyqty.&nbsp;</p>

«Sottalýshy J., aktsıonerlik qoǵamnyń qurylymdyq bólimshesine tıesili „A.“ JShS ókildiginiń dırektory bola tura, áreket etýshi kelisimsharttardy bilip, astyq qabyldaý kásiporny men astyq ıesiniń arasynda astyqty saqtaýǵa óz betinshe jarııa sharttar jasaǵan. Osylaısha ol 2021 jyldyń tamyz aıynda „№. baza“ mekemesiniń dırektory bola tura, is júzinde astyqty qabyldamaı, taýar-transporttyq júkqujatqa „№. bazasyna“ 3 JShS men sharýa qojalyqtardan 101,7 mln. teńgege 891 415kg. bıdaı astyǵy ólshenip, saqtaýǵa qabyldandy dep kórineý jalǵan málimetterdi engizgen», — delingen sottyń habarlamasynda. 

Sondaı-aq J., atalǵan JShS dırektorlarynan jalǵan kórsetilgen astyq kólemin ótkizýdi talap etip, nátıjesinde 3 JShS jáne sharýa qojalyqtarynyń dırektorlarynan jalpy somasy 95 mln. teńge alǵan.

Odan bólek, J. 2021 jyldyń qazan aıynan bastap 2023 jyldyń qańtar aıyna deıingi aralyqta «№. bazasynyń» dırektory qyzmetin atqara otyryp, «S.» JShS-nen 58,5 mln. teńgeniń 474 468kg. astyqty jalǵan túrde saqtaýǵa qabyldap, ol úshin 35 mln. teńge qolma-qol aqsha qarajatyn alǵan.

«Ári qaraı, 2022 jylǵy qyrkúıekten jeltoqsanǵa deıingi kezeńde „№. bazasynda“ elevatordyń dándi daqyldarmen tolyq toltyrylýyna baılanysty astyqty saqtaýǵa múmkindigi bolmaǵan. Osyǵan qaramastan sottalýshynyń nusqaýymen astyq úzdiksiz qabyldanyp, nátıjesinde quny 118,7 mln. teńge turatyn 996 750kg. bıdaı qabyldanyp, jaramsyz kúıge túsken. Aktsıonerlik qoǵamnyń qurylymdyq bólimshesine keltirilgen zalaldyń mólsheri — jalpy somasy 278,9 mln. teńge bolatyn 2 362 633kg. bıdaıdy quraǵan», — dep habarlady Astana qalasynyń qylmystyq ister jónindegi aýdanaralyq soty.

Sottalýshynyń kinási jábirlenýshi ókiliniń, kýálerdiń aıǵaqtarymen, saraptamashylardyń qorytyndylarymen, zattaı dáleldemelermen jáne qylmystyq is boıynsha materıaldarmen dáleldendi.

Sottalýshy kinásin moıyndady, qorǵaýshy tarap sottalýshyǵa eń tómengi jaza taǵaıyndaýdy surady.

Sot úkimimen J. QK 189-baby 4-bóliginiń 2) tarmaǵynda, 371-babynyń 2-bóliginde kózdelgen qylmystyq quqyq buzýshylyqtardy jasaǵany úshin kináli dep tanylyp, múlki tárkilenip, memlekettik qyzmette jáne kvazımemlekettik sektor sýbektilerinde laýazymdardy atqarýdan ómir boıyna aıyra otyryp, túpkilikti 8 jyl 5 aı merzimge bas bostandyǵynan aıyrý jazasy taǵaıyndaldy.

Úkim zańdy kúshine engen joq.