Jalǵan aqsha satqan Oral turǵyny 5 jylǵa bas bostandyǵynan aıyryldy

ORAL. QazAqparat – Oral qalalyq sotynda jalǵan aqsha satýmen birge alaıaqtyqpen aınalysqan Konstantın Kovalenkoǵa qatysty úkim shyqty, dep habarlaıdy QazAqparat tilshisi.

BQO boıynsha ekonomıkalyq tergep-tekserý departamentinen málim etkendeı, atalǵan azamat QR QK 231-baby 2-bóligi (jalǵan aqsha nemese baǵaly qaǵazdar jasaý, saqtaý, alyp ótý nemese ótkizý) jáne 190-baby 1-bóligine (alaıaqtyq) sáıkes aıypty dep tanylǵan.

5 jylǵa sottalǵan Kovalenko jazasyn qaýipsizdigi barynsha joǵary qylmystyq-atqarý júıesi mekemesinde óteıdi.

«K.Kovalenko jalǵan jeti 100 AQSh dollaryn satqan. Sondaı-aq L. degen áıeldiń altyn alqasyn aldaý jolymen satyp alyp, oǵan 220 myń teńge kóleminde materıaldyq zalal keltirgen», dep habarlady vedomstvodan.

Úkim zańdy kúshine endi.

Eske sala keteıik, budan buryn Oralda qarjy pıramıdasyn uıymdastyrýshylardyń 12,6 mln teńgeni jymqyrǵanyn jazǵan bolatynbyz.