Jalǵa beriletin turǵyn úı qurylysy memlekettik baǵdarlamasyn júzege asyrý barysyn baqylaý úshin «jedel jeli» qurý qajet - D. Nazarbaeva

ASTANA. QazAqparat - Jalǵa beriletin turǵyn úı qurylysy memlekettik baǵdarlamasyn júzege asyrý barysyn baqylaý úshin «jedel jeli» qurý qajet. Bul týraly búgin turǵyn úı qurylysy memlekettik baǵdarlamasynyń oryndalýyn qadaǵalaıtyn qoǵamdyq keńestiń birinshi otyrysynda QR Parlamenti Májilisi tóraǵasynyń orynbasary Darıǵa Nazarbaeva aıtty.

«Zańdylyqtyń buzylýy, qurylys merzimderiniń keshiktirilýi, páterlerdiń sapasynyń syn kótermeıtindigi syndy faktilerge jol bermeý qajet. Menińshe, bizdiń qoǵamdyq keńeste «jedel jeli» uıymdastyrý kerek sııaqty. Onda azamattar habarlasyp, kezekte turǵandarǵa qatysty ádiletsiz sheshimderdiń oryn alýy, qurylys merziminiń keshiktirilýi, páterdiń sapasyzdyǵy jaıynda aqparat bere alar edi», - dedi D.Nazarbaeva.

Aıta keterligi, aldaǵy bes jylda elimizde 1,5 mln. sharshy metr turǵyn úı, ıaǵnı 29 myń áleýmettik jalǵa beriletin páter salý josparlanǵan. Aǵymdaǵy jyldyń ózinde ǵana 487 myń sharshy metr jalǵa beriletin turǵyn úı salý kózdelgen. Memleket basshysynyń tapsyrmasymen naýryz aıynda Astana, Almaty, Qostanaı, Kókshetaý, Semeı qalalarynda jalpy aýmaǵy 76,5 myń sharshy metrdi quraıtyn 1357 páter paıdalanýǵa beriledi.