Jalǵa beriletin turǵyn úı baǵdarlamasyna 4,6 myń adam ótinish berdi
«QR Úkimetiniń 2019 jylǵy 31 jeltoqsandaǵy №1054 qaýlysymen turǵyn-úı kommýnaldyq damýdyń 2020-2025 jyldarǵa arnalǵan «Nurly jer» memlekettik baǵdarlamasy bekitilgen bolatyn. Memlekettik baǵdarlamanyń bir baǵyty –«Qazaqstandyq ıpotekalyq kompanııasy» AQ arqyly satyp alý quqyǵymen jaldamaly turǵyn úı alý baǵdarlamasyn júzege asyrý. Bıyl naýryz aıynda Nur-Sultan qalasy ákimdigi men «Qazaqstandyq ıpotekalyq kompanııasy» AQ arasynda kommýnaldyq turǵyn-úı qorynda turǵyn úıge muqtajdar esebinde turǵan ákimdikke baǵynyshty bilim berý, densaýlyq saqtaý, mádenıet, sport, áleýmettik qyzmetkerler, polıtsııa departamenti jáne tótenshe jaǵdaı departamentinde jumys isteıtin qyzmetkerler úshin satyp alý quqyǵy bar jaldamaly turǵyn úılerdi satý týraly kelisimge qol qoıylǵan bolatyn», - deıdi Nur-Sultan qalasy ákimdiginiń «Turǵyn úı qory» KMM túgendeý jáne esepke alý bóliminiń mamany Aqnur Maqsatqyzy.
Onyń aıtýynsha, osy jyly Nur-Sultan qalasy ákimdigi turǵyn-úı kommýnaldyq memlekettik mekemesi osy baǵdarlama aıasynda 244 páterge ótinish qabyldaǵan.
«Ótinishti qabyldaý 28 qyrkúıek pen 2 qazan aralyǵynda júrgizildi. Osy ýaqyt aralyǵynda 4 635 azamattan ótinish kelip tústi. Toqtalyp ótetin bolsam: bilim berý salasy boıynsha 2 030, densaýlyq saqtaý salasy boıynsha – 723, mádenıet salasy boıynsha – 209, sport salasy boıynsha – 84, áleýmettik sala boıynsha – 668, polıtsııa departamentinen – 613, tótenshe jaǵdaılar departamentinen – 308 ótinish kelip tústi. Atalǵan baǵdarlama nátıjesi boıynsha barlyq sanat boıynsha kezekte turǵan azamattar qatysa aldy. ıAǵnı memlekettik mekemedegi, bıýdjettik mekemedegi qyzmetkerler, áskerı qyzmetkerler, sonymen qatar halyqtyń áleýmettik jaǵynan osal tobyna jatatyn azamattar, ata-anasynyń qamqorlyǵynsyz qalǵan balalar men kópbalaly otbasylardan ótinishter kelip tústi. Qazirgi ýaqytta túsken ótinishterdi qarastyryp jatyrmyz», - deıdi ol.