Jalǵa beriletin páterlerdiń jartysynan salyq túspeıdi - Qarjy mınıstrligi

ASTANA. QazAqparat - Qazaqstanda jalǵa beriletin páterlerdiń 40-50 paıyzynan salyq túsimi túspeı, ol páterler «kóleńkede» qalǵan. Bul týraly QR Qarjy mınıstrligi Memlekettik kirister komıtetiniń Kameraldyq monıtorıng basqarmasy basshysynyń orynbasarynyń mindetin atqarýshy Erbol Amerhanov Astanada ótken baspasóz máslıhatynda málim etti, dep habarlaıdy QazAqparat tilshisi.

Turǵyn úılerdi zańsyz jalǵa berý máselesi sóz bolǵan jıynda aıtylǵandaı, qazirgi ýaqytta jyljymaıtyn múlikke baılanysty bıznes - tabysy mol kásip kózi. Birinshi kezekte jyljymaıtyn múlikti jalǵa berýge jeke tulǵanyń da jáne onyń ishinde jeke kásipker retinde tirkelmegen zańdy tulǵalardyń da quqyǵy bar.

«Jeke tulǵa múliktik tabys alǵan kezde salyq eseptiligin turǵylyqty jer boıynsha tabys etýge mindetti. Bul jaǵdaıda salyq mólsheri tabys mólsheriniń 10 paıyzyn quraıdy. Eger jeke tulǵa kásipker retinde tirkelse, onda salyq kodeksimen rejımdi tańdaý quqyǵy belgilengen. Birinshisi - ol patent negizindegi arnaıy salyq rejımi. 2018 jyldyń basynan bastap patent negizindegi salyq rejıminiń stavkasy páterdi jalǵa beretinder úshin 2-den 1 paıyzǵa deıin qysqartyldy. Bul mehanızm jaldamaly eńbekti paıdalanbaıtyn jáne tabysy 7 mln teńgeden aspaıtyn adamdar úshin qoljetimdi. Mysaly, eger jeke tulǵa páterin aıyna 100 myń teńgege jaldaýǵa beretin bolsa, onda jeke tulǵa kásipker retinde tirkelip, patent negizinde arnaıy salyq rejımin tańdap, kiris somasynyń 1 protsentin salyq retinde tóleıdi. Munda negizgi talap - jaldamaly jumysshylardyń bolmaýy jáne salyq aldyn ala tólenýi kerek», - deıdi Erbol Amerhanov.
 

Onyń aıtýynsha, Memlekettik kirister organdary turaqty túrde ishki ister organdary men ákimdiktermen birge jaýapsyz jalǵa berýshilerdi tabý boıynsha reıdti júrgizip keledi. Quzyrly organdarmen birlesken reıd jumystarynyń nátıjesinde 2017 jyly ózdigimen 9 myń jalǵa berýshi kásipker ózdigimen tirkeldi. 2018 jyldyń 8 aıynyń qorytyndysy boıynsha taǵy 7 myń jalǵa berýshi kásipker ózdigimen tirelgeni belgili bolyp otyr.

«Jalǵa berilip jatqan baspanalardyń kóbi áli de kóleńkede qalyp qoıyp jatyr. Bekitilgen merzimde salyqtyq esepti bermegen jalǵa berýshiler úshin birinshi jaǵdaıda eskertý jasalady. Jalǵa berýshi ony eskermese 15 AEK kóleminde aıyppul arqalaıdy. Jaýapkershilikten jaltarmaý úshin biz jalǵa berýshilerge zańdy saqtaýǵa shaqyramyz. Bizdiń oıymyzsha Qazaqstandaǵy jalǵa berilip jatqan páterlerdiń 40-50 paıyzy áli de kóleńkede. Olardy zańǵa júgindirý baǵytynda jumys júrgizilýde», - deıdi Erbol Amerhanov.