Jalǵa beriletin baspana 47,2% qymbattady – Ulttyq statıstıka bıýrosy

ASTANA. QazAqparat – Qyrkúıek aıynda jalǵa beriletin baspana aqysy 47,2% qymbattady. Bul týraly QR Strategııalyq josparlaý jáne reformalar agenttigi Ulttyq statıstıka bıýrosynan málim etti, dep habarlaıdy QazAqparat.

«Qyrkúıek aıynda turǵyn úıdi jalǵa berý usynystarynyń baǵasy jyldyq mánde 47,2% ósti.

Ótken aıda turǵyn úıdiń bir sharshy metri úshin jaldaý aqysynyń ortasha baǵasy 4 612 teńgeni qurady, bir aı buryn 4 029 teńge mólsherinde bolǵan edi», - delingen málimette.

Óńirler boıynsha baǵa tek Almaty qalasynda joǵary. Onda jalǵa berýshiler sharshy metri úshin 5 611 teńge surap otyr. Baspana arendasy, sondaı-aq Astana men Aqtaý qalalarynda qymbat, sharshy metrine tıisinshe 4 485 jáne 3 253 teńgeden.

Jalǵa beriletin baspananyń eń tómengi baǵasy Qyzylorda (sharshy metri úshin 1 797 teńge), Taraz (sharshy metri úshin 1 809 teńge) jáne Jezqazǵan (sharshy metri úshin 1 845 teńge) qalalarynda tirkelgen.

Sonymen qatar, turǵyn úıdi jalǵa alý baǵasy bir aıdyń ishinde Qostanaı qalasynda aıtarlyqtaı qymbattaǵan – birden 42,6%. Baǵa qarqyndy túrde Petropavl qalasynda da ósti – 27%. Bul «úshtikte» Qaraǵandy qalasy da bar, onda qyrkúıek aıynda úıdi jalǵa alý quny tamyzben salystyrǵanda 21% artty.

Baspanany jalǵa berý baǵasy bolmashy mólsherde Túrkistan (0,6%), Taldyqorǵan (3,5%), Shymkent (3,9%) jáne Qyzylorda (4,3%) qalalarynda kóterilgen.

Eske salaıyq, elimizde qyrkúıek aıynda jyldyq ınflıatsııa 17,7% qurady. Tutyný baǵalary ındeksiniń qurylymynda aqyly qyzmetter 12,3% qymbattady.