Jalaqysy saqtalmaıtyn demalysqa jiberilgen qazaqstandyqtarǵa áleýmettik tólem berile bastady

NUR-SULTAN. QazAqparat - Jalaqysy saqtalmaıtyn demalysqa jiberilgen qazaqstandyqtarǵa Memlekettik áleýmettik saqtandyrý qorynan tólemder taǵaıyndaý bastaldy, dep habarlaıdy QazAqparat QR Eńbek jáne áleýmettik qorǵaý mınıstrliginiń baspasóz qyzmetine silteme jasap.

Memlekettik áleýmettik saqtandyrý qory (MÁSQ) TJ kezeńinde eńbekaqysy saqtalmaıtyn májbúrli eńbek demalysyna ketýine baılanysty tabysynan aıyrylǵan jumys isteıtin azamattarǵa jańa áleýmettik tólemderdiń alǵashqy taǵaıyndaýyn jasady.

Bir adamǵa shaqqandaǵy mólsheri aıyna 42,5 myń teńgeni quraıtyn áleýmettik tólemdi (eń tómengi jalaqy) Almatynyń eki turǵyny aldy.

Esterińizge sala keteıik, MÁSQ-tan jańa tólem Qazaqstan aýmaǵynda eńbek qyzmetin júzege asyratyn QR azamattaryna kelesi sharttarǵa sáıkes beriletin bolady:

- áleýmettik tólem tótenshe jaǵdaı jarııalanýyna baılanysty jalaqysy saqtalmaıtyn demalysqa jiberilgen (jumystan bosatylmaǵan) qyzmetkerlerge júzege asyrylady;

- tólem alý úshin qyzmetkerlerge (jeke kásipkerler jáne jeke praktıkamen aınalysatyn adamdar ózi úshin) tótenshe jaǵdaı engizilgenge deıin sońǵy 12 aıda MÁSQ-qa kem degende 3 aı boıy jarna aýdarýy qajet;

- áleýmettik tólem shaǵyn, orta jáne mıkrobıznes qyzmetkerlerine; jeke kásipkerlerge (budan ári – JK); jeke praktıkamen aınalysatyn adamdarǵa (notarıýs, jeke sot oryndaýshysy, advokat, kásibı medıator); BJT tóleýshilerine qoldanylady.

Jańa áleýmettik tólemderdi taǵaıyndaý úshin jumys berýshiler (JK, jeke praktıkamen aınalysatyn adamdar jáne BJT tóleýshiler óz betinshe júginedi) «Elektrondyq úkimet» veb-portalynda «Elektrondyq ótinish» servısi arqyly jumyspen qamtý máseleleri jónindegi jergilikti organǵa TJ kezeńinde qyzmettiń shektelýine baılanysty olardyń qyzmetkerleriniń kirisiniń joǵalýyn rastaıtyn qujattardy, qyzmetkerlerdiń tizimin jáne qyzmetkerlerdiń jalaqysy saqtalmaıtyn demalys berý týraly buıryqtan úzindi kóshirmeni qosa bere otyryp ótinish berýi qajet.

Jumys berýshilerdiń (JK jáne basqa sanattaǵy) ótinimderi negizinde halyqty jumyspen qamtý máseleleri jónindegi aýdandyq (qalalyq) shtab áleýmettik qoldaý kórsetý týraly sheshim qabyldaıdy, al «Azamattarǵa arnalǵan úkimet» memlekettik korporatsııasynyń bólimsheleri MÁSQ tólem jasaıtyn qyzmetkerlerdiń tizimin derbes qalyptastyrady.

Áleýmettik tólem qyzmetkerge jalaqysy saqtalmaıtyn eńbek demalysy kezinde, biraq tótenshe jaǵdaıdyń uzaqtyǵynan aspaıtyn merzimde tólenedi.