Jalaqynyń ýaqtyly berilýin baqylaıtyn monıtorıngti kúsheıtemiz – Nurymbetov

NUR-SULTAN. QazAqparat – Eńbek jáne halyqty áleýmettik qorǵaý mınıstri Birjan Nurymbetov jumys oryndarynyń saqtalýy men jalaqynyń ýaqtyly tólenýin baqylaıtyn monıtorıng jumysynyń kúsheıtiletinin málim etti, dep habarlaıdy QazAqparat tilshisi.

«Syrtqy naryqta qalyptasyp jatqan jaǵdaı jáne ishki ekonomıkaǵa túsip jatqan salmaqqa qaramastan Úkimet tarapynan halyqtyń aldynda alǵan barlyq áleýmettitk mindetteme oryndalady. Bizdiń elimizde 4 mıllıonnan astam zeınetker, ártúrli járdemaqy alýshy bar. Olarǵa tıisti qarajat – 3 trln 400 mlrd teńge kóleminde qarastyrylǵan», - dedi Birjan Nurymbetov Úkimettiń baspasóz ortalyǵynda ótken baspasóz máslıhatynda.

Mınıstrdiń aıtýyna qaraǵanda, jumyspen qamtý sharalary da tolyǵymen júzege asyrylatynyn málim etti.

«Bul rette «Eńbek» memlekettik baǵdarlamasynyń áleýeti paıdalanylady. Qarajat respýblıkalyq jáne jergilikti bıýdjetten qarastyrylǵan. Jumys berip júrgen azamattardyń jumys oryndarynyń saqtalýy, jalaqynyń ýaqtyly tólenýin baqylaıtyn monıtorıng júıesi bar. Osy monıtorıng jumysyn sál kúsheıtýge týra keledi», - dedi ol.

Eske sala ketsek, búgingi Úkimet otyrysynda Ulttyq ekonomıka mınıstri Rýslan Dálenov memleket áleýmettik mindettemelerin tolyq kólemde qarjylandyratynyn aıtqan edi.