Jalaqyny ósirý: Qaraǵandynyń myńnan astam kásiporny Elbasy bastamasyn qoldady

QARAǴANDY. QazAqparat - Qaraǵandy oblysynyń shaǵyn jáne orta bıznes ókilderi Elbasynyń 1 qańtardan bastap eńbekaqyny ulǵaıtý týraly bastamasyn qoldady. Osy oraıda, bir myńnan astam kásiporyn qala jáne aýdan ákimdikterimen memorandýmdarǵa qol qoıdy. Bul týraly Eńbek ınspektsııasy jónindegi basqarma basshysy Qanatbek Balsarıev apparat jınalysynda aıtty, dep habarlaıdy QazAqparat.

Jalaqyny ósirý jaıly birinshi bolyp oblystyń iri júıe qurýshy kompanııalary málim etti. 

«Bul kompanııalarda aılyqtyń ósýi jalaqysy tómen jumyskerlerge ǵana qatysty emes, eńbekaqy deńgeıine qaramastan, barlyq sanattar qamtylatyn bolady. Bul, 80 myńnan astam adam», - dep atap ótti Qanatbek Balsarıev.

Qaraǵandy oblysynda taǵy 1047 kásiporyn men uıym 7 myńnan astam qyzmetkerdiń eńbekaqysyn ulǵaıtýdy kózdep otyrǵandaryn aıtty. Olar qala jáne aýdan ákimdikterimen memorandýmdar jasasty. Bul kelisimderde sondaı-aq qyzmetkerlerdiń sanyn qysqartý jáne aılyqaqyny keshiktirýge jol bermeý de qarastyrylǵan. 

Basqarma basshysynyń aıtýynsha, eńbekaqy kásiporyn formasyna qaraı 12-den 25% deıin artady dep kútilýde. 
«Jalaqynyń ulǵaıýy jerlesterimizdiń barynsha kóp sanyn qamtý úshin bul jumysty ári qaraı jalǵastyrý qajet. Kásiporyn basshylyǵymen kezdesińizder, máseleni talqylańyzdar, - dep tapsyrdy oblys ákimi Erlan Qoshanov.