Jalaqy az, eńbek jaǵdaıy nashar: Abaı oblysynda jumysshylar shaǵymy eskerildi
Jarma aýdanynda ornalasqan «SHARCEM» JShS sıngapýrlyq kompanııaǵa tıesili. Tsement shyǵarýmen aınalysatyn zaýyt jumysshylary jalaqynyń mardymsyzdyǵyn, eńbek jaǵdaılarynyń nasharlyǵyn aıtyp, Prezıdent Qasym-Jomart Toqaevtyń atyna shaǵym túsirdi.
Abaı oblysy ákimdiginiń málimetine súıensek, aımaq basshysy Nurlan Uranhaev jumys saparymen Jarma aýdanynda kelip, zaýyt ujymymen kezdesti. Buǵan deıin aýdan ákimdigi jáne quzyrly oblystyq basqarma ókilderi JShS ıesimen ótkizgen jıyn nátıjesinde osy jyldyń 1 qyrkúıeginen bastap 200 qyzmetkerdiń jalaqysyn kóterý týraly sheshim qabyldanǵan bolatyn. Qazir munda qyzmetkerlerge arnalǵan jataqhana men ashanada jóndeý jumystary júrgizilip jatyr.
«Eń aldymen, barlyq qoldanystaǵy eńbek kelisimsharttaryn qatań saqtaý shart. Biz úshin ár qyzmetkerdiń quqyǵynyń saqtalýy mańyzdy. Budan bólek, jańa qyzmetkerlerdi jumysqa qabyldaý kezinde Jarma aýdanynyń turǵyndaryna basymdyq berilýi qajet», - dedi ákim.
Kezdesý barysynda jóndeý jumystarynyń aıaqtalý merzimderi de naqtylandy. Atap aıtqanda, ashanany 30 qyrkúıekke deıin, jataqhanany 30 qarashaǵa deıin aıaqtaý josparlanǵan.
Aıta keteıik, atalmysh zaýyt 2022 jyly paıdalanýǵa berilgen. Onyń óndiristik qýaty jylyna 1,2 mln tonna tsementti quraıdy. Kásiporynda 330 adam jumys isteıdi. Onyń 37%-y Jarma aýdany Shar qalasynyń turǵyny.