Jaqyp Asanov sýdıalarǵa: Sanktsııalardy burqyratyp bere bergendi doǵaryńdar

ASTANA. QazAqparat - Sottalýshylardyń jáne olardyń týǵan-týystarynyń barlyq múlkin buǵattaý tájirıbesin doǵarý qajet. Bul týraly búgin sot tóreligin júzege asyrýdyń 2017 jylǵy qorytyndysyna arnalǵan keńeıtilgen keńeste QR Joǵarǵy sotynyń tóraǵasy Jaqyp Asanov aıtty, dep habarlaıdy QazAqparat.

«Múlikti buǵattaýǵa qatysty aıtar bolsam, bul tájirıbe túbegeıli ózgeredi dep oılaımyn. Ózgermeıtin bolsa, onda sýdıalardy belgilengen tártippen jaýapkershilikke tartamyz. Tek qana kúdiktiniń emes, sonymen birge onyń týǵan-týystarynyń, dostarynyń, balalarynyń múlkin, barlyǵyn buǵattaıdy. Kúni keshe normatıvtik qaýly qabyldandy. Endigi ýaqytta qylmystyq jolmen alynǵandyǵy týraly málimetter bar múlik qana buǵattalady. Eger ondaı málimet bolmasa, onda buǵattaýdyń qajeti joq. Bizdiń quqymyz joq», - dedi Joǵarǵy sot tóraǵasy.

Jaqyp Asanov tergeý sottary sotqa deıingi kezeńde sot baqylaýyn laıyqty deńgeıde qamtamasyz etýi tıistigin basa aıtty.

«Muny bizdiń protsessýaldy zańnamamyz talap etedi. Tergeýshi sýdıalardan notarıýstarǵa, tergeýshilerge aınalmaýdy suraımyn, sanktsııalardy burqyratyp bere bergendi doǵaryńdar», - dedi ol.

Onyń aıtýynsha, aǵymdaǵy jyldan bastap sanktsııany tek sýdıalar ǵana beretin bolady. Sonymen qatar sanktsııa bergen soń onyń negizdiligin de jan-jaqty tekserý mindetti.

«Eger kúdik jetkiliksiz bolsa, onda ol tutqynǵa alýǵa sanktsııa berýden bas tartýy qajet. Tergeýshi sýdıa jıi tergeýshiniń jetegine erip ketedi. Tergeýshiniki túsinikti, olar óz jumystaryn jeńildetedi. Kúdikti qol astynda bolǵan kezde olar jaqsy. Moıyndatý da jeńil», - dedi Jaqyp Asanov.