Jaqyp Asanov: Sýdıalar halyq tilinde sóıleýi kerek

NUR-SULTAN. QazAqparat - Joǵarǵy sotta QR Prezıdenti janyndaǵy adam quqyqtary jónindegi komıssııanyń keńeıtilgen májilisi ótip jatyr, dep habarlaıdy QazAqparat tilshisi.

QR Joǵarǵy sotynyń tóraǵasy Jaqyp Asanov búgingi tańda zaman talaby Qazaqstannyń sot júıesine qandaı mindetter júktep otyrǵanyn aıtty.

«Halyqaralyq mamandar Qazaqstanda sotqa júginý jeńildep, onymen qatysty shyǵyndardyń azaıǵanyn aıtady. Rasymen de buryn azamattar bir is boıynsha 2 jyl júretin bolsa, qazir protsesterdiń kóbi bir jyldan aspaıdy. Aryzdardyń 90 paıyzy ınternet arqyly túsetin boldy. «Doing Business1 reıtıngine sensek, sot protsesterine qatysýshylarǵa jaǵdaı jasaý boıynsha álemde tórtinshi orynda turmyz. Degenmen, el Prezıdenti sot júıesine birqatar syn aıtqan bolatyn. Sot protsesine qatysýshylarǵa jaǵdaı jasaýdan buryn, sýdıalarǵa degen el senimin arttyrý kerektigin tapsyrdy. Al sýdıalarǵa senim qabyldaǵan sheshimderi negizdi bolǵanda ǵana qalyptasady. Taraptar úkimniń árbir ýájine jaýap tabýy kerek. Sýdıa óz sheshimin jarııalaǵannan keıin zańnyń qasań tilimen emes, halyqtyń tilimen túsindirip berýi kerek. Sonda ǵana joǵarǵy satylarǵa aryz jaýdyrý azaıady», - dedi Joǵarǵy sot tóraǵasy.

Eske salsaq, Memleket basshysy Qasym-Jomart Toqaev Joǵarǵy sot tóraǵasy Jaqyp Asanovqa sot júıesin jetildirý jumystaryn jalǵastyrýdy tapsyrǵan bolatyn.

Aldaǵy 2,5 jyldyń ishinde sot júıesi laıyqsyz kadrlardan tolyq tazartylmaq.