Jaqyp Asanov: Sot sheshimin túsindirsek, Astanaǵa túser shaǵym anaǵurlym azaıar edi

ASTANA. QazAqparat - QR Joǵarǵy Sotynyń tóraǵasy Jaqyp Asanov sot sheshimderin azamattarǵa túsindirýdiń qanshalyqty paıdaly ekenin aıtyp berdi, dep habarlaıdy «QazAqparat» HAA tilshisi.

«Biz 2018 jyldyń 15 qańtarynan bastap respýblıka boıynsha pılottyq joba bastaǵan edik. Osy pılottyq joba aıasynda sýdıalar óziniń sheshimin, úkimin nemese qaýlysyn jarııalaǵan kezde azamattarǵa ony birden túsindiretin bolǵan. Osy pılottyq jobanyń bastalǵanyna eki aıdaı ýaqyt bolyp, bir aıdyń qorytyndysyn qazir taldap otyrsaq, osy aralyqta 7347 sot sheshimi boıynsha túsindirý jumystary júrgizilipti. Sol isterdiń ishinde tek 142 iske qatysty shaǵym túsken. Bul - isterdiń 1,9 paıyzy ǵana. Bul - biz úshin arman. Bizde 10-nan, tipti keıbir kategorııalar boıynsha qaıta shaǵym túsken isterdiń úlesi 20 paıyzǵa jetip jatady. Demek, adamdar sot sheshimin, tipti jeńilip qalǵan kúnniń ózinde, túsingennen soń eshqandaı qarsylyqsyz qabyldaıdy», - dedi Asanov Joǵarǵy Sottyń búgingi jalpy otyrysynda.

Joǵarǵy Sot tóraǵasy, sonymen birge, naqty mysaldardy keltirdi.

«Máselen, SQO sottarynda 274 sot sheshimi túsindirilip, 1 sot sheshimi boıynsha ǵana qaıta shaǵym túsken. Al endi qarańyz, sot sheshimi túsindirilgennen keıin Aqmola, BQO, OQO oblystarynda birde-bir iske qatysty shaǵym túspegen. Biz árbir isti kásibı túrde túsindiretin bolsaq, onda joǵarǵy ınstantsııaǵa, ásirese Astanaǵa túsetin shaǵymdardyń anaǵurlym azaıatynyna senimim kámil. Sol kezde Joǵarǵy sot kassatsııalyq deńgeıde isterdiń bárin qarap, barlyq kedergilerdi joıar edi», - dedi Jaqyp Asanov.

Eske sala ketsek, Joǵarǵy Sottyń búgingi otyrysynda sot sheshimin qurastyrý ádisi boıynsha normatıvtik qaýlynyń jobasy tanystyryldy.