Jaqyp Asanov QR Prezıdentine jyl qorytyndylary men aldaǵy kezeńge arnalǵan josparyn baıandady

ASTANA. QazAqparat - Memleket basshysy Nursultan Nazarbaev Bas prokýror Jaqyp Asanovty qabyldady, dep habarlaıdy Aqordanyń baspasóz qyzmeti.

Kezdesý barysynda Jaqyp Asanov Nursultan Nazarbaevqa quqyq qorǵaý organdarynyń 2016 jylǵy qyzmetiniń qorytyndylary jáne aldaǵy kezeńge arnalǵan jumys jospary týraly baıandady.

Qazaqstan Prezıdenti eldegi qoǵamdyq qaýipsizdik ahýalyn jaqsartýǵa baǵyttalǵan reformalardyń mańyzdylyǵyn atap ótti.

- Osy jyldar ishinde biz barlyq salada reforma jasap kelemiz. El táýelsizdiginiń 25 jyldyǵynyń qorytyndysy boıynsha ekonomıkalyq ósim jáne turǵyndardyń ál-aýqaty artqanyn baıqaımyz. Alaıda, quqyq qorǵaý organdary qyzmetiniń máseleleri eshqashan ózektiligin joǵaltqan emes. Biz tıisti sharalar qabyldap, zańnamalarǵa ózgerister engizýdemiz, - dedi Elbasy.

Memleket basshysy burynǵy kezde tirkelgen qylmystar sany aldyńǵy jylǵy kórsetkishten kóp bolsa, quqyq qorǵaý organdary jazalanyp otyrǵanyn aıtty.

- Jazadan qashyp, málimetterdi jasyrǵan nemese ózgertken jaıttar kezdesip jatatyn. Al qazir faktiler mindetti túrde tirkelýi tıis, - dedi Nursultan Nazarbaev.

Qazaqstan Prezıdentine Úkimettiń keńeıtilgen otyrysynda berilgen tapsyrmalardy oryndaý barysynda bıznes ókilderine júrgiziletin tekserister sanyn azaıtý maqsatymen qabyldanǵan sharalar týraly aıtyldy. Budan bólek, Bas prokýror quqyq qorǵaý salasyndaǵy memleketaralyq qarym-qatynastardy nyǵaıtý, ekonomıkalyq quqyq buzý jaıttarymen kúresý úshin kadrlar daıarlaý jóninde júrgizilip jatqan is-sharalardy atap ótti.

J.Asanovtyń aıtýy boıynsha, Bes ınstıtýtsıonaldyq reformany jáne Qazaqstan Prezıdentiniń «Qazaqstannyń úshinshi jańǵyrýy: jahandyq básekege qabilettilik» atty joldaýyn iske asyrý barysynda qazirgi ýaqytta prokýratýra organdary aldyna qoıylǵan mindetterdi oryndaý, atap aıtqanda, ákimshilik jáne qylmystyq úderisterdi elektrondyq-tsıfrlyq formatqa kóshirý, sondaı-aq jekelegen jobalardy iske asyrý úshin barlyq qajetti sharalar qabyldanýda.

- Qoǵamdyq qaýipsizdikti jaqsartýdyń taǵy bir ındıkatory - bas bostandyǵynan aıyrylǵandar sany. Qazaqstanda olardyń sany 90-shy jyldardyń basynda 100 myńǵa jýyq edi, búginde bas bostandyǵynan aıyrý oryndarynda odan úsh ese tómen - 36 myń adam otyr, - dedi Bas prokýror.

Sońynda Memleket basshysy el zańnamasy normalarynyń saqtalýyn baqylaıtyn organ retinde prokýratýranyń aıryqsha rólin atap ótip, Bes ınstıtýtsıonaldyq reforma men Qazaqstan halqyna joldaýdyń iske asyrylý barysyn qatań baqylaý qajettigin aıtty.

Elbasy kezdesý qorytyndysy boıynsha birqatar naqty tapsyrma berdi.