Jaqyp Asanov BUU Bas hatshysynyń orynbasary Vladımır Voronkovpen kezdesti
Baspasóz málimetterine qaraǵanda, Senat tóraǵasynyń orynbasary óz sózinde Qazaqstan terrorızmge qarsy kúrestegi álem qoǵamdastyǵynyń ujymdyq kúsh-jigerdi biriktirýin jaqtaıtynyn jáne bul qubylystyń barlyq túrin únemi aıyptaıtynyn atap ótti.
«Qazaqstannyń 2020-2030 jyldarǵa arnalǵan syrtqy saıasat Tujyrymdamasynda halyqaralyq terrorızm men ekstremızmge qarsy is-qımylda jahandyq jáne óńirlik kúsh-jigerdi biriktirýge járdemdesý basymdyqtardyń biri bolyp belgilendi. Bizdiń elimiz BUU Qaýipsizdik Keńesiniń tıisti qararlarynyń talaptaryn qaltqysyz oryndap keledi jáne Birikken Ulttar Uıymynyń terrorızmge qarsy jalpyǵa birdeı barlyq 19 konventsııasy men hattamasyn ratıfıkatsııalady», - dedi Jaqyp Asanov.
Taraptar kezdesý barysynda TMD Terrorızmge qarsy ortalyǵy, ShYU-nyń Aımaqtyq terrorızmge qarsy qurylymy, UQShU aıasyndaǵy óńirlik qaýipsizdikti jáne quqyq qorǵaý men arnaıy memlekettik organdardyń qyzmetin nyǵaıtý máselelerin talqylady.
Qazaqstandyq depýtat sondaı-aq Qazaqstanda elimizdiń ulttyq qaýipsizdigin qamtamasyz etýde terrorızmge qarsy is-qımyl mindeti basym baǵyttardyń biri bolyp tabylatynyn atap ótti.
«Qazaqstan Ortalyq Azııa óńirinde birinshi bolyp 2013-2017 jyldarǵa arnalǵan dinı ekstremızm men terrorızmge qarsy is-qımyl jónindegi memlekettik baǵdarlamany qabyldady, ol keıinnen keńeıtilip, uzartyldy. «Terrorızmge qarsy is-qımyl týraly» jáne «Ekstremızmge qarsy is-qımyl týraly» zańdar qabyldandy, olar jahandyq kórinister men jańa syn-qaterlerdi eskere otyryp turaqty túrde jetildiriledi jáne mańyz berilip keledi», - dep atap ótti Asanov.
Taraptar Qazaqstanda bolyp jatqan saıası oqıǵalardy da talqylady. Senat tóraǵasynyń orynbasary Jaqyp Asanov Memleket basshysynyń bastamasy boıynsha elimizdi saıası jańǵyrtýǵa baǵyttalǵan keshendi jáne júıeli ózgerister týraly habardar etti.