Jaqyp Asanov bilikti zańgerlerdiń sýdıa bolýǵa nelikten talpynbaıtynyn aıtty

NUR-SULTAN. QazAqparat - Sýdıalardyń otbasyna kóńil bólýge múmkindigi az. Joǵarǵy sot tóraǵasy Jaqyp Asanov QR Prezıdenti janyndaǵy adam quqyqtary jónindegi komıssııanyń keńeıtilgen májilisinde osylaı málim etti, dep habarlaıdy QazAqparat tilshisi.

Sot júıesindegi kadrlyq reformalarǵa toqtalǵan Jaqyp Asanov 2017 jyly Qazaqstan kóleminde sýdıalardyń qyzmetten óz erkimen ketý kórsetkishi boıynsha tarıhta bolmaǵan statıstıka tirkelgenin eske aldy.

«2017 jyly sýdıalardyń óz erkimen qyzmetten ketýi jıilegen bolatyn. Qazaqstan sot júıesiniń tarıhynda buryn-sońdy ondaı statıstıka tirkelmepti. Onyń sebebi kóp. Mysaly, bir sýdıa kúnine 10 sheshim qabyldaýy kerek. ıAǵnı, sýdıanyń otbasyna kóńil bólýine múlde múmkindigi joq. Sol úshin olardyń júktemesin azaıtý boıynsha zańǵa ózgerister engizdik. Jyl basynan beri sot isine qatysty 16 zańdy jańartýdy qolǵa aldyq. Qazir onyń altaýy qoldanysta. 7 qujat Parlament qaraýynda jatsa, 3 qujat memlekettik organdardyń maquldaýyn kútýde», - deıdi Joǵarǵy sot tóraǵasy.

Óz sózinde Jaqyp Asanov bilikti zańgerlerdiń sýdıa bolýǵa qulyqsyz ekenin de aıtty.

«Sýdıa bolýǵa bilikti mamandar qulyqsyz. Óıtkeni sýdıa bolýdyń qıyndyǵyn biledi. Áleýmettik turǵyda durys qorǵalmaǵan Buǵan deıin júktemesi aýyr edi. Kareralyq ósý, basshylyqqa taǵaıyndaý, jaqsy qalalarǵa aýysý protsesterinde ádildik az boldy. Sońǵy 10 jylda sýdıalardyń júktemesi udaıy artyp kelgen. Byltyr ǵana azaıdy. Sonyń arqasynda bıyl sýdıa bolýǵa nıettilerdiń sany 2 esege ósip, eń bastysy bilikti sýdıalardyń óz erkimen ketýi toqtady, - dedi ol.

Aıta ketsek, bıyl jyl sońyna qaraı qyzmet babyndaǵy sýdıalardyń laýazymyna qanshalyqty laıyqty ekenin tekserý bastalady.

Eske salsaq, Memleket basshysy Qasym-Jomart Toqaev Joǵarǵy Sot tóraǵasy Jaqyp Asanovqa sot júıesin jetildirý jumystaryn jalǵastyrýdy tapsyrǵan bolatyn.

Aldaǵy 2,5 jyldyń ishinde sot júıesi laıyq emes kadrlardan tolyq tazartylmaq.