Jaqynda «Samuryq-Qazyna» qyzmetkerler shtatyn 22 paıyzǵa deıin jańartpaq

ASTANA. QazAqparat - «Samuryq-Qazyna» ulttyq ál-aýqat qory» AQ 2015 jyly jarııa etken jańa uıymdastyrý qurylymyn jasaqtaýǵa kiristi. Bul týraly búgin Ortalyq kommýnıkatsııalar qyzmetindegi baspasóz máslıhatynda atalǵan Qordyń basqarma múshesi - Adam resýrstaryn basqarý jónindegi basqaraýshy dırektor Ulan Tájibaev málim etti.

Atap aıtqanda, Qordyń jańa uıymdastyrý qurylymyna ótý úrdisi 2016 jyldyń basynda bastaldy jáne birinshi jarty jyldyqqa deıin jalǵasady.

«Uıymdastyrý qurylymyn ońtaılandyrý jumysy júrip jatyr. Biz basqarýshy quramdy 16-dan 9 adamǵa deıin qysqarttyq, sondaı-aq qyzmetkerler sanyn 15 paıyzǵa deıin qysqartýdy kózdep otyrmyz»,-dedi U. Tájibaev.

Onyń sózine qaraǵanda, biliktilik talaptarynyń kúsheıýine baılanysty sońǵy eki jylda Qor shtaty 65 paıyzǵa jańardy. Jaqynda 22 paıyzǵa deıin jańartý josparlanýda.

Osy oraıda U. Tájibaev jańarǵan qyzmetkerler halyqaralyq tájirıbe men standarttardy ıgergen joǵary bilikti mamandar bolatynyn atap ótti.