Jaqynda latyn álipbıine qatysty ǵalymdarmen bir jobaǵa toqtaımyz - QR Prezıdenti
Memleket basshysy Nursultan Nazarbaev «Habar» telearnasyna bergen suhbatynda osylaı málim etti, dep habarlaıdy QazAqparat.
«Eń birinshi bastaǵan jumystardyń arasyna qazaqtyń jańa álipbıi endi. Jalpy,jazba tarıhymyz óte tereńde jatyr. Bul kırıllıtsadan ketip qalý saıasatynan shyǵyp otyrǵan joq, ıaǵnı ol túbegeıli másele. Kırıllıtsanyń ishinde bizge kerek emes áripter bar. Osy áripterdi paıdalansaq, bizdiń tilimizdiń negizin buzyp jiberedi. Ekinshiden, latyn qarpine kóshkende orys tilinen ketý degendi bildirmeıdi. Alypqashpa sózben keıbir saıasatkerler osyny aıtady, ásirese, orys tilinde. Álipbı tek qana qazaqtyń tiline baılanysty másele. Orystyń tilinde kırıllıtsada orys basylymdary shyǵa beredi»,-dep toqtaldy Elbasy.
Osy oraıda Prezıdent orys tilin bilý elimizge kerek ekenin, ǵylym men tehnıkanyń kózi bolyp otyrǵan salalar orys tiline kóp aýdarylǵanyn, sondyqtan bundaı mol derek qorynan ajyrap qalýǵa bolmaıtynyn atap ótti.
N. Nazarbaevtyń sózine qaraǵanda, latynǵa kóshý negizdi ári oryndy túrde júrgiziletin bolady.
«Mysaly, bizdiń zııaly qaýymnyń shyǵarmalary qalyp qoıýy múmkin degen pikir bar. Bul jerde eshqandaı másele joq, qazirgi ýaqytta álipbı jańadan engizilse, kompıýter arqyly qaripterdi tez arada aýdaryp jiberýge bolady. Osy turǵyda meniń eshbir kúmánim joq, eshteńe de artta qalyp qoımaıdy»,-dedi Memleket basshysy.
Bul rette Prezıdent úlken jumys atqarylyp jatqanyn jetkizdi.
«Jaqynda bir-eki mátinin qaraıtyn bolamyn. Osymen aınalysyp júrgen ǵalymdardyń barlyǵyn jınap, olarmen birge qarap, bir iri jobaǵa toqtaıtyn bolamyz»,-dedi Nursultan Nazarbaev.
Memleket basshysynyń paıymynsha, latyn álipbıine kompıýterdiń pernetaqtasyna laıyqtalǵan nusqa arqyly kóshýge bolady.
«Meniń oıymsha, aldymen álipbıdi daıarlap, jarııalap, baıyppen engizý kerek. Jalpy aıtqanda, qazir balalardyń barlyǵy aǵylshyn tilin oqıdy. Onyń negizinde latyn qarpi. Sondyqtan eshqandaı problema bolmaıdy. Bul úlken saıası másele jáne barlyq elderde solaı bolǵan. Ol qazaq tiliniń múddesi, ıaǵnı tildi saqtap qalýymyz úshin jasap otyrǵan úlken tarıhı qadam»,-dedi Prezıdent.