Jaqynda qaıtys bolǵan Gúlmıra Kárimovanyń depýtattyq ókilettigi toqtatyldy
«Ótken aptada áriptesimiz Gúlmıra Kárimova kenetten qaıtys boldy. Bul qaza barshamyzdyń qabyrǵamyzdy qaıystyryp ketti. Gúlmıra Raıymbekqyzy Soltústik Qazaqstan oblysynda jaýapty qyzmetter atqaryp, óńirdiń órkendeýine zor eńbek sińirdi. Bilim jáne ǵylym mınıstrliginde eńbek etip, otandyq bilim berý salasyn damytýǵa úlken úles qosty. Taıaýda ǵana Senat depýtaty bolyp saılanǵan áriptesimiz, shyn máninde, bilikti maman edi. Osyndaı qıyn jaǵdaı - úlken tragedııa. Sol sebepti, eń aldymen, áriptesimizdiń otbasy men jaqyndaryna Senat atynan taǵy da kóńil aıtamyz», - dedi Senat tóraǵasy Máýlen Áshimbaev.
Jalpy otyrys barysynda palata depýtattary G. Kárimovanyń ókilettigin toqtatý týraly qaýlyny qabyldady.
Aıta keteıik, senatordyń qaza bolýyna baılanysty Senat depýtatynyń ókilettigi toqtaǵannan keıin, Ortalyq saılaý komıssııasy 2 aıdyń ishinde shyǵyp qalǵan depýtattyń ornyna óńirde saılaý ótkizýi tıis.
Budan buryn habarlanǵandaı, 27 qańtar kúni túnde jańadan saılanǵan senator Gúlmıra Kárimova kenetten qaıtys bolǵan edi. Ol 46 jasqa qaraǵan shaǵynda dúnıeden ozdy.
Qańtar aıynyń aıaǵynda bul jaǵdaıǵa qatysty sot-medıtsınalyq saraptamasynyń aldyn ala qorytyndysy shyqty.
«Sot-medıtsınalyq saraptamasynyń aldyn ala qorytyndysyna sáıkes, naýqas óliminiń tikeleı sebebi – júrek talmasy (jedel mıokard ınfarktisi). Anafılaktıkalyq shok dıagnozy rastalǵan joq», - delingen Astana qalalyq Qoǵamdyq densaýlyq saqtaý basqarmasynyń málimetinde.
2023 jyly 14 qańtarda ótken saılaýda Soltústik Qazaqstan oblysynan Joǵarǵy palataǵa depýtat boldy.
Foto:gov.kz