Jaqyn perspektıvada astyq óndirý men ony eksporttaýdy arttyrý basty mindet bolýy tıis - Q. Toqaev
Búgin QR Parlamenti Senatynda «Agroónerkásip keshenin ındýstrııalandyrý mindetteri jáne bıýdjet qarajatyn tıimdi paıdalanýdy arttyrý» taqyrybynda ótken parlamenttik tyńdaý barysynda Senat Tóraǵasy Qasym-Jomart Toqaev osylaı málim etti, dep habarlaıdy QazAqparat.
Senat Tóraǵasynyń aıtýynsha, álemdik astyq eksporttaýshylardyń alǵashqy bestigine kiretin Qazaqstan, ótken jyly dúnıejúzi boıynsha un eksportynan birinshi orynǵa shyqqan. «Aǵymdaǵy jyly da astyq ónimderiniń rekordtyq kórsetkishi jınaldy. Sondyqtan da, memleketimizdiń azyq-túlik balansy qamtamasyz etilip otyr dep batyl jarııalaýǵa bolady. Árıne, bul eń aldymen aýyl sharýashylyǵy eńbekkerleriniń jemisi. Endigi maqsat astyqty durys saqtap, ulttyq baılyǵymyzdy tıimdi paıdalaný bolyp tabylady. Osy rette, jerdiń, eńbektiń, materıaldyq resýrstardyń jáne salaǵa zamanaýı tehnologııalardy engizýdiń múmkindikterin esepke ala otyryp, jaqyn perspektıvada astyq ónimi men onyń eksporty aýqymyn arttyrýǵa mindettimiz dep oılaımyn», dedi Q. Toqaev.
Sonymen birge, sóz arasynda Senat Tóraǵasy sońǵy jyldary memleket tarapynan agroónerkásip keshenin damytýǵa qatysty turaqty qoldaýdyń júzege asyp otyrǵanyn da atap ótti. Spıkerdiń aıtýynsha, 2009-2012 jyldarǵa arnalǵan respýblıkalyq bıýdjette agroónerkásip salasyna 668 mlrd. teńgeden astam qarajat jumsaý kózdelgen. «Agroónerkásip kesheni salasyna otandyq jáne sheteldik ınvestıtsııa aýqymy da ósip otyr. Bul árıne, oń úderis», dedi Q. Toqaev.