#JaqsylyqJasa: Jas kásipkerler 2 mln teńge jınap, muqtaj otbasylarǵa kómek kórsetti

ALMATY. QazAqparat - Almatyda «Jaqsylyq jasaýdan jarysaıyq!» atty qaıyrymdylyq sharasy ótti. Kópbalaly otbasylarǵa jáne múmkindigi shekteýli ata-analar men balalarǵa qoldaý kórsetý maqsatynda uıymdastyrylǵan ıgilikti iske «Bıznes bastaý» kásipkerlik mektebi uıytqy boldy, dep habarlaıdy QazAqparat tilshisi.

«Búginde qymbat kóligimen, kózdiń jaýyn alatyn kóılegimen, toı-tomalaqtaǵy mol dastarhanymen maqtanatyn, sol arqyly abyroı jınaıtyn jandardyń qarasy kóbeıdi. Ókinishke qaraı, qoǵamdyq qundylyqtar ózgerip, zaman almasty. Meniń oıymsha, jastar arasynda meıirbandyq, adamgershilik, jomarttyq syndy qasıetterdi kópke úlgi etý úshin is-sharalardy kóptep ótkizýimiz qajet. Memleket - ol bılik qana emes, ol árbir azamat dep oılaımyn. Qoǵamnyń áljýaz toptaryna kómek qolyn sozý - árbir otandasymyzdyń paryzy hám jaýapkershiligi. Halyqaralyq áıelder kúni qarsańynda qolǵa alynǵan marafon osy nıetpen uıymdastyryldy», - deıdi «Bıznes bastaý» kásipkerlik mektebiniń basshysy Ahmetbek Nursıla.

Igi shara nátıjesinde 700-den astam muqtaj otbasyǵa kómek kórsetildi.

Marafon boıynsha jas kásipkerler 2 mln teńge jınady. Bul aqsha 20 kópbalaly otbasyna qarjylaı jáne 40 januıaǵa materıaldyq kómek retinde taratyldy. Sondaı-aq múmkindigi shekteýli sábılerdiń emine de qarjylaı kómek berildi. Sonymen qatar, osyndaı kómekke muqtaj otbasylardyń arnaıy tizimi belgilenip, jas kásipkerler aldaǵy ýaqytta olarǵa da qol ushyn sozbaq.

Aıta keteıik, qaıyrymdylyq marafonyn ótkizý aldaǵy ýaqytta da dástúrge aınalady.