#JaqsylyqJasa: Qyzylordalyq polıtseıler balalarǵa arnap kontsert uıymdastyrdy

QYZYLORDA. QazAqparat - Qyzylordalyq polıtsııa qyzmetkerleri az qamtylǵan jáne kópbalaly otbasynda tárbıelenip jatqan jetkinshikterge arnalǵan qaıyrymdylyq sharasyn ótkizdi, dep habarlaıdy QazAqparat tilshisi.

Bul ıgilikti shara Qazaqstan Respýblıkasy Іshki ister mınıstrliginiń bastamasymen uıymdastyrylǵan «Baqytty balalyq shaqty qorǵaý» jobasy aıasynda qolǵa alyndy. Atalmysh shara barysynda kontserttik baǵdarlama ótkizildi. Oǵan qonaq retinde «Azııa daýysy» festıvaliniń jáne «Daryn» konkýrsynyń laýreaty, elimizge tanymal ánshi Beıbit Qorǵan shaqyrtyldy.

Atalmysh kontsertke az qamtylǵan jáne kópbalaly otbasylardyń balalary, polıtsııa organdarynda esepte turǵan jasóspirimder jáne oblys turǵyndary shaqyryldy.

Іshki ister mınıstrliginiń bastamasymen «2018 jyl - baqytty balalyq shaq jyly» bolyp jarııalanǵan edi. Bul ımıdjdik joba qoǵamdaǵy balalarǵa qatysty jasalatyn zańsyz áreketterdiń jolyn kesý, olarǵa qoldaý kórsetý qaǵıdatyn qalyptastyrýǵa baǵyttalǵan.

Asqar Toqmaǵambetov atyndaǵy mádenıet úıinde 400-ge jýyq bala jınaldy. Zaldaǵy kóńil-kúı jyly ári jaıdary boldy. Mýzyka bastalǵannan keıin jas kórermender ánniń yrǵaǵymen ánshige qosylyp óner kórsetti.