#Jaqsylyqjasa: Eriktiler shala týǵan balalarǵa shulyq toqıdy
Mundaı uıym álemniń 8 memleketinde bar. Al Qazaqstanda 15 qalada taralǵan.
Karla Nurdyń aıtýynsha, bul uıym 2012 jyly qurylǵan. Alǵashynda shamamen 30 adam shala týǵan balalardyń aıaǵyna tońbas úshin jún shulyq toqýmen aınalysa bastaǵan. Shulyqtardyń alǵashqy toqý shemasy 28 jipten turatyndyqtan, klýb ataýy «28 jip» dep atalǵan.
Qazir qor demeýshilerdiń kómegimen jumys istep tur.
«Men toqý bilmeıtinmin. Biraq alǵa maqsat qoısa, adam kez-kelgen nársege qol jetkize alady. Eger de seniń kómegiń muqtaj adamdardyń kádesine jarap jatsa, tipti birden úırenip alýǵa bolady. Nıet bolsa boldy. Adam toqymaǵa bir úırenip alsa, tastaı almaıdy. Eriktilerdiń árqaısysy óz úıinen jip pen symyn alyp keledi», - dedi Karla Nur.
Resmı derekterge sensek, Qazaqstanda 500 myńǵa jýyq bala týady. Olardyń 4-12%-y shala týylyp qalady. Olardyń kópshiliginiń salmaǵy 1 keliden sál asady.
Klýbtyń eriktileri kelinshekter aptasyna bir bas qosyp, toqyma toqýmen aınalysady.
Sonymen qatar, túzetý kolonnııalarynda otyrǵan áıelderge sheberlik saǵattary ótkizilip turady.
Eriktiler eki aıda 50-200 zat toqyp úlgeredi.
«28 jip» úılestirýshisi Zınat Abdrahmanova bul klýbqa kezdeısoq kelgen adamdardyń biri. Klýb týraly aqparatty áleýmettik jeliden kórgen.
«Meniń eki balam, úsh nemerem bar. Klýbqa kezdeısoq keldim. Internetten qaıyrymdylyq qory týraly aqparat izdep júrip osy qorǵa keldim. 2015 jyldan beri osyndamyn. Qazir klýbsyz ómir súrýdi elestete almaımyn», - dedi Zınat Abdrahmanova.
Búginde 30 erikti qaladaǵy barlyq perınataldy ortalyqtardy, perzenthanalardyń reanımatsııalaryn toqylǵan shulyqtarmen qamtamasyz etedi.
«Toqylǵan shulyqtar balany emdeıdi. Shala týǵan balanyń aıaqtaryndaǵy júıke talshyqtaryn titirkendirip, olardyń jumys jasaýyna yqpal etedi», - dedi úılestirýshi. #Jaqsylyqjasa: «28 jip» eriktileri shala týǵan balalarǵa 200 jún shulyq toqıdy.