#JaqsylyqJasa: Astanalyqtar aıazda avtobýs kútkenderdi kólikpen jetkizýge shaqyrdy

ASTANA. QazAqparat - Astanalyqtar shyńyltyr aıazda aıaldamada avtobýs kútken turǵyndardy kólikterimen jetkizip tastap jatyr. Mańaıyna beı-jaı qaramaıtyn elordalyq kólik ıeleri jaqsylyq jasaýmen birge osy úrdiske ózge adamdardy da atsalysýǵa shaqyrady, dep habarlaıdy QazAqparat tilshisi.

Evgenıı Aleksandrovıch esimdi feısbýk jelisindegi qoldanýshy qala shetinde turatynyn jazady.

«Mańaıymyzda jaqsy adamdar barshylyq. Ózim qala shetinde turǵandyqtan, mundaı aıazda úıge jetý ońaıǵa túspeıdi. Búgin avtobýs kútip, aıaldamada jalǵyz turǵan edim. Ádette, avtobýstar jıi kele bermeıtin shaq edi. Osy kezde bir kólik jaqyndap kelip, «otyr, aparyp tastaımyn» dedi. Al qolymda qolma-qol aqsha joq-tyn - bári kartochkada edi. Toqtaǵan kólik ıesine: «Jaraıdy, avtobýspen jetip alarmyn» dedim. Osy kezde adamdar jıi aıta bermeıtin «Tegin aparyp tastaımyn. Áıtpese tońyp qalarsyń» degen sózdi estidim. Aqyry, osylaısha, úıge jetip aldyq. Jolda ol taǵy da úsh adamdy otyrǵyzyp aldy. Tipti óz úıinen alys bolsa da, otyrǵyzǵan adamdardyń bárin de úıine jetkizip tastady», - dep jazady astanalyq turǵyn.

Evgenıı Aleksandrovıchtiń jazýynsha, elordada baǵany kótermeı, tipti úıge tegin aparyp tastaıtyn kólik ıeleri barshylyq.

«Kólik ıelerine ótinishim: aıazdy kúni tońyp qalǵandardy jetkizip tastasańyzdar eken. Ózimdi aıtyp turǵanym joq. Eń aldymen, áıelder men balalardy, qarttardy otyrǵyzyp alsańyzdar, jaqsylyqtaryńyz umytylmas», - deıdi ol.

Al ‎Jomart Ámirhanov‎ esimdi taǵy bir jigit «Astana - Chto? Gde? Kogda?» feısbýk tobynda túnde kóliginiń otalmaı qalǵanyn jazady.

«Kórshilerim kómektesti. Osy jaqsylyq úrdisin jalǵastyryp, aıazdy kúnderi bireýge kómektesýdi jalǵastyrsaq deımiz. Kólikti jylytyp bere alamyn. Osy jazbanyń astyna mekenjaı men telefondy qaldyryńyz. Men sol jaǵalaýdamyn. Osy toptaǵy adamdardyń bárin de bir-birine kómektesýge, aparyp tastaýǵa, kólikti jylytyp berýge, dúkende shaı ysytyp berýge, kólikti ıterisip jiberýge shaqyramyn. Jaqsylyqtardy kóbeıte bereıik», - dep jazady Jomart Ámirhanov.

Jaqsylyq jasaý úrdisine shaqyrǵan azamattar feısbýkte óz jazbalaryn #DelaıDobro #JaqsylyqJasa heshtekterimen taratýda. Jaqsylyqty ózinen bastaǵan azamattar ózge de astanalyqtar osy bastamaǵa atsalysar dep senim bildiredi.