Jaqsylyqtyń úlken-kishisi joq – volonter Gúlmıram Srajova
Aqtóbelikter múmkindigi shekteýli jandardyń janynan tabylyp, jigerin janyp, alǵa umtylýǵa kómek qolyn sozyp júrgen Gúlmıram Srajovany jiti tanıdy. Eki aıaǵy men bir qolynan aıyrylsa da ózgemen teń turyp, ómirden baz keshkenderdi tyńdaı alatyn, olardyń ómirlik kózqarasyn ózgertýge bar bilimi men biligin salatyn jandy úlgi tutady.
Áp degennen-aq eriktilerdiń isin baıandaı jónelgen ol bul salanyń ótkeni men búginin saralap berdi. Alda atqarar istiń baǵytyn baǵamdady.
«Volonter jyly belgilengen kezde elordada úlken forým ótti. Ulttyq volonterler jelisi uıymdastyrǵan jıynǵa Memleket basshysy Qasym-Jomart Toqaev qatysty. Jyldyń ereksheligin atap ótip, bizderdi birlikke, izgilikke úgittedi, birge jumys isteýge shaqyrdy. Elimizdiń ár óńirindegi eriktiler telekópir arqyly qatysyp, yntalandy, bolashaqqa jospar qurdy. Men – erekshe janmyn. Sondyqtan múmkindigi shekteýli adamdar arasynda volonterler qozǵalysyna úles qosyp júrgen jaıym bar. Ózimniń baǵytym – áleýmettik volonter. Biz tabıǵı, tehnogendi apatty kútip otyrmaımyz. Bolýy múmkin qıyndyqtyń aldyn alýǵa kúsh jumyldyramyz. Máselen, 15 jasymda vokzaldaǵy perronda úıilgen qardyń tazartylmaýynan osy kúıge tústim, poıyz qaǵyp ketti. Eki kún buryn jaýǵan qardy ýaqytyly tazartsa, joǵary klass oqýshylary járdem berse, eriktiler jumylsa, oqys oqıǵa tirkelmes edi. Qazir de dál sondaı jaǵdaı bolýy múmkin. Tek sol aýmaqqa jaýapty adamǵa kiná artyp, otyra berýge bolmaıdy. Bárimiz kómek kórsetýimiz kerek. Qala ishinde muz bolǵanda eriktiler shyqty, tuz ben topyraq septi. Ol da – kómek. Densaýlyqtan artyq eshteńe joq», - dedi erikti Gúlmıram Srajova.
Órt sóndirýge, qar qursaýynda qalǵandarǵa kómek kórsetýge asyq turatyn adamdar qoǵamǵa qajet. Bul – qaıyrymdy adamnyń isi. Ári adamdy adamnan artyq etetin de osy áreketi.
«Kúni keshe ǵana «Volonter-2020» toby quryldy. Olar jumylyp jumys istep, tórt otbasyna páter alyp berdi. «Ańsar» volonterler toby da jyldy qorytyndylap jatyr. Neǵurlym kóp bolsa, soǵurlym tańdaý jasap, adamdardy qatarǵa qosýǵa múmkindik bar. «Anticovid-19» toby bolsa indet kezinde quryldy. Eresek, ómirlik tájirıbesi bar adamdar jumylǵan. Olar aýrýhanalarǵa ottegi ballondaryn tasyp, kereýetter jınap berdi. Meniń oıymsha, jaqsylyqtyń úlken-kishisi joq. Tamshydan teńiz quralady desek bolady. Karantın kúsheıgen kezde kóbi úıinde boldy. Dál sol shaqta saýsaqpen sanarlyq azamat shyqty. Úıde otyrǵandardy qorqaq, sol mezette qolǵabys etkenderdi batyl dep aıta almaımyz. Olar qajettiligin sezindi. Ár zamannyń, kezeńniń óz batyry, volonteri bar. Úıde otyrǵandary da durys. Talap ta sondaı boldy ǵoı», - dedi erikti Gúlmıram Srajova.
Eńbek esh ketpedi. «D.A.R» klýbynyń eriktisi Jiger Kenjeǵalıev, Abzal Jaken, Elmıra Jetpisbaeva, Gúlmıram Srajova «Halyq alǵysy» medaline ıe boldy. Jiger Kenjeǵalıev «Daryn» jastar syılyǵyn aldy.
«Volonter bolǵan adam eń birinshi ózine paıda ákeledi. ıAǵnı, ózi týraly pikiri qalyptasady, qoǵamǵa qajettiligin sezinedi. Dos tabady, tájirıbe jınaıdy. Eriktilerdiń ishki tárbıesi joǵary ekeni sózsiz. Ózim eriktilerdiń ortasynda júrgenime esh ókinbeımin. Óıtkeni bilimimdi paıdalanyp, adamdarǵa motıvatsııa bere alamyn. Karantın kezinde úıim shtab sekildi boldy. Páterge bárin jınap, bólip, sony jetkizýge úles qostym. Ári turmystyq zorlyq-zombylyqtyń aldyn alý úshin qalalyq prokýratýra ortalyq ashyp, birneshe adam psıhologııalyq, quqyqtyq keńes berdik», - dedi G.Srajova.
Ol karantın kezinde otbasyndaǵy daý-janjaldyń kóbeıgenin jasyrmady. Baýyrlar arasyndaǵy tartys, ata-ana arasyndaǵy janjal, erli-zaıyptylardyń urys-kerisi – tájirıbeli mamandardyń nazarynda boldy.
«Kishkentaı balalardyń qylyǵy da tańǵaldyrdy. Olar telefon shalyp, ata-anasynan zábir kórgenin aıtty. Taǵy bir habarlama kezinde jas kelinniń soqqyǵa jyǵylǵanyn bildik. Turmystyq jaǵdaıy jaqsy, úıli-kúıli bolsa da kúıeýi áıelin urady. Olar ajyrasty. Shynyn aıtqanda, bizge psıhologtar men zańgerlerdiń aqysyz kómegi kerek. Qazir Aqtóbede kómek kórsetýge daıyn zańgerler bar, tek psıhologııalyq járdem berer adam tapshy», - dedi erikti.
Sonymen birge korporatıvti volonterler qataryn arttyrǵan jón dep sanaıdy. Aqtóbede birneshe zaýyt osy baǵytty qoldaǵan. Alaıda «seniń jumysyń bolmasyn» dep keri tartatyndar tabylady.
«Volonterlik adamnyń negizgi jumysyna kedergi keltirmeýi tıis. Aptasyna eki saǵatyn arnasa da jetkilikti. Bul jolda biz bárin ózimiz atqara almaımyz. Jergilikti atqarýshy organdar kómektesedi. Olar uıymdastyrady, qoldaý kórsetedi. Sonymen birge kásipkerler qoldaýǵa ázir. Qazir «Qoljetimdi Qazaqstan» jobasyn júzege asyryp jatyrmyn. Bul ǵımarattardyń múmkindigi shekteýli jandarǵa qoljetimdi bolýyn qamtamasyz etýge baǵyttalǵan sharýa. Ǵımarat múgedekter, júkti áıelder, balaly ana, qarttarǵa kirip-shyǵýǵa yńǵaıly bolýy tıis. Esebimiz boıynsha 3 myń nysannyń fotosyn túsirip, saıtqa salýymyz kerek edi. Biraq biz tek 500 sýret júktedik. Aıyptap, quqyǵyn shektemeımiz. Aıyppul da sala almaımyz. Jaǵdaıdy naqty kórsetemiz», - dedi G.Srajova.
Aqtóbelik eriktilerge túrli sala mamandary kómektesýge ázir. Biraq olardyń kóbi óz aty-jónin aıshyqtap, jar salmaıdy. Dáriger, tilshi, muǵalim, til mamandary qatardan tabylyp júr. Nazarbaev Zııatkerlik mektebiniń oqýshylary múmkindigi shekteýli balalarǵa onlaın sabaq beredi. Aǵylshyn tili men matematıka pánderiniń tapsyrmalaryn oryndaýǵa kómektesedi.
Bir adamnyń birneshe baǵytty qamtýǵa da múmkindigi bar. Gúlmıra Srajova osy qatardan. Bir ózi jas eriktilerge tálim-tárbıe beredi, adamdarǵa kómektesý jolyn uıymdastyrady, monıtorıngilik top múshelerimen tekserý jumystaryna atsalysyp, sporttyq jarystarǵa qatysady. Ol úshsaıystan QR sport sheberi. Birneshe ret jeńil atletıkadan el chempıony atyndy. Paralımpıada oıyndary boıynnsha tórt dúrkin Qazaqstan chempıony da boldy. Aqtóbe qalalyq sal aýrýyna shaldyqqan azamattardy qoldaý ortalyǵynyń atqarýshy dırektory bul jetistiktiń «D.A.R» eriktiler tobynan bastalǵanyn aıtyp berdi.
«Volonterdiń utqyr tusy kóp. Qýat alyp, óz kúshińdi de jumsaısyń. Tek bir jumysta júrsek, sharshatady, jalyqtyrady. Volonter adamnyń oıy bólinip, jeke bastyń damýyna oń áserin tıgizedi. Ári bul jalǵyzdyń isi emes. Komandamen kóp nárseni tyndyrýǵa bolady. Úlken jaýapkershilikti talap etedi. Áleýmettik jelide volonterdiń jumysyn joqqa shyǵaratyndar tabylady. Kishkentaı isti aıtyp, kórsetken abzal dep esepteımin. Ol da bolsa adamdarǵa oı salady. Sonymen birge «Kúmis volonter», ıaǵnı zeınetkerlerdiń aqyl-parasatyn kádege jaratýymyz tıis. Osy jaǵyn da oılaǵan jón. Sonda ustazdardyń moınyna artylǵan júk salmaǵy jeńilder edi. Shynyna kelgende olar eriktilerdiń bar sharýasyn tyndyryp júr. Muǵalimderdiń jumysyn dáripteıtin, erikti retinde tanıtyn arnaıy medal shyǵarsa da artyq bolmas edi», - dedi sózin qorytyndalady G.Srajova.