#Jaqsylyq jasa: «Smart School» synyptarynda 170 naýqas bala bilim aldy

ALMATY. QazAqparat - Almatyda Balalar hırýrgııasy men pedıatrııa ǵylymı ortalyǵy bazasynda onkologııalyq naýqas balalardy qoldaýǵa baǵyttalǵan «Smart School» ınnovatsııalyq synyby ashyldy, dep habarlaıdy QazAqparat tilshisi.

Jobany «Help Today» qoǵamdyq qory uıymdastyrdy.

Bir jyl ýaqyt ishinde ortalyqta 170 bala bilim aldy. Ár sabaqqa 5-4 bala qatysty.

Uıymdastyrýshylardyń aıtýynsha, ınnovatsııalyq klass onkologııalyq naýqas balalardyń uzaq merzimdi em sharasy barysynda bilim protsesinen qol úzbeýi úshin ashylǵan.

«Sabaqtardy sertıfıkattalǵan ustazdar júrgizedi. Tálimgerler sýret salýdy, qolóner buıymdaryn jasaýdy úıretedi. Sabaqtar art-terapııa, oıyn túrinde ótkiziledi. Ustazdardyń barlyǵy streske tózimdilik boıynsha arnaıy synaqtan ótken. Olar naýqas balalar men ata-analarmen qalaı jumys isteýdi biledi», - dedi «Help Today» qoǵamdyq qorynyń basshysy Elmıra Alıeva.

Balalar aǵylshyn tilin, lego-quraý, robot tehnıkasy, shahmat, doıby oınaýdy úırenedi.

Sabaqqa ata-analar da belsendi qatysady.

«Innovatsııalyq klasstar balaǵa oń yqpalyn tıgizip jatyr. Onyń nátıjesin ata-analar men dárigerler kórip jatyr. Mundaı synyptardyń bolǵany óte jaqsy. Sebebi, balalar 7-8 aı úzdiksiz em alǵan kezde bala aýyr dertinen bir mezgil bolsyn kóńilin aýlaýǵa bolady», - dedi Elmıra Alıeva.