#Jaqsylyq jasa: ShQO-da Jastar resýrstyq ortalyǵy birneshe otbasyn qamqorlyqqa aldy

ASTANA. QazAqparat - Semeı qalasynyń turǵyndary áleýmettik jaǵynan az qamtylǵan otbasylarǵa jan-jaqty kómek kórsetip jatyr. Bul jaıynda Semeı aqparattyq ortalyǵynan málim etti, dep habarlaıdy QazAqparat tilshisi.

Máselen, ótken demalys kúnderi «Hamır Elektromontaj» JShS Ohotnıkamı.kz-men birlesip, 7 kópbalaly otbasyǵa materıaldyq kómek kórsetti.

«Biz ýaqytymyz pen aqsha bóldik. Muqtaj otbasyǵa qýanysh syıladyq. Barlyqtaryńyzdy birigip, halyqtyń osyndaı toptaryna kómek kórsetýge shaqyramyn», - dep jazdy áleýmettik jelide Jomart Kárimjanov.

Jastar resýrstyq ortalyǵy birneshe kópbalaly otbasyn óz qamqorlyǵyna alyp otyr. Jastar olardyń aýlalaryndaǵy qardy ǵana tazalap qoımaı, qajetti azyq-túlik te satyp alyp berýde.

Semeı qalalyq bilim berý basqarmasy da mundaı ıgi isgi isten tartynyp otyrǵan joq. Olar taıaý kúnderi 50-ge jýyq kópbalaly otbasynyń qal-jaǵdaıyn bilmek. Al №38 orta mekteptiń otbasy áleýmettik kómekti qajet etetin birneshe otbasyǵa qol ushyn berdi. Bul aktsııaǵa qaladaǵy taǵy 15 oqý orny qosylyp otyr. Jalpy muǵalimder ujymy 23 otbasyǵa materıaldyq jáne qarjylyq kómek kórsetti.

Qalalyq Mádenıet úıiniń ujymy da mundaı qaırylymdylyq sharadan tys qalmady. Ártister 5 bala tárbıelep otyrǵan 2 toptaǵy múgedek jannyń otbasyna azyq-túlik jetkizip berip, aýlasyndaǵy qaryn da tazalady.

Eriktiler qalanyń qoǵamǵa beı-jaı qaramaıtyn turǵyndary mundaı sharalarǵa belsene qatysyp, áleýmettik kómekke muqtaj kópbalaly otbasylarǵa kómek kórsetedi dep úmittenedi.

Aıta keterligi, búgingi kúni Semeı qalasynda ataýly áleýmettik kómek alatyn 221 kópbalaly otbasy bar.