#Jaqsylyq jasa: Múgedek janǵa qolǵabys etken avtobýs júrgizýshisi tanymal boldy

ALMATY. QazAqparat - Almatyda óziniń qaıyrymdylyǵymen Qaznet qoldanýshylaryn qýantqan avtobýs júrgizýshisi Erbol Omarov ózi týraly aıtyp berdi, dep habarlaıdy QazAqparat tilshisi.

Áleýmettik jelide taralǵan aqparatta №115 avtobýs júrgizýshisi aıaldamada kútip turǵan arbadaǵy jolaýshyny kóterip kirgizip, arnaıy orynǵa otyrǵyzǵan. Aıaldamaǵa jetken soń ol kólikti toqtatyp, múmkindigi shekteýli jolaýshyny ózi túsirip jibergen.

Onyń bul áreketi kópshiliktiń rızashylyǵyn týǵyzdy. Kóp adam bul protsesti vıdeoǵa túsirip alyp, arnaıy pablıkterge jarııalap jiberdi.

Erbol Omarov 19 jyldan beri kólik júrgizip keledi. Sońǵy ret ol qalalyq №115 avtobýsty tizgindegen.

Onyń ákesiniń de mamandyǵy júrgizýshi eken.

«Úlken avtobýstar, qozǵaltqyshtar, tehnıka meni burynnan qyzyqtyrady. Balyq aýlaǵandy unatamyn. Muqtaj adamǵa kómektesý ár adamnyń mindeti dep oılaımyn», - dedi E.Omarov.

«Júrgizýshi aıaldamada avtobýs kútip turǵan múmkindigi shekteýli adamǵa kómektesken. Avtobýstan túsip, jolaýshyny salonǵa kirgizip, arnaıy orynǵa otyrǵyzǵan. Barlyq talap etiletin qyzmetin oryndaǵan. Biraq, ol óziniń tanymal bolyp ketkenine yńǵaısyz bolyp júr. Onyń ornynda kez-kelgen júrgizýshi osylaı eter edi dep oılaımyz», - dedi «Almatyelektrotrans» kompanııasyn ókilderi.

Jumys berýshiniń aıtýynsha, Erbol qyzmet barysynda bir de bir eskertý almaǵan.