Jaqsylyq jasa: Batysqazaqstandyq kásipker kópbalaly otbasyǵa páter kiltin tabys etti

ORAL. QazAqparat - Oralda búgin kópbalaly otbasyǵa páter kilti tabys etildi, dep habarlaıdy QazAqparat tilshisi.

«Meıirimdi kóktem» jobasy aıasynda «Qaz-Hol» JShS basshysy Tımýr Ámın jeti balanyń anasy Manar Búrkitovaǵa úsh bólmeli páterdiń kiltin tapsyrdy.

Atalmysh páter Qurmanǵazy kóshesi 198-mekenjaıynda 22 aqpan kúni paıdalanýǵa berilgen toǵyz qabatty úıde ornalasqan. Apatty jaǵdaıdaǵy qos qabatty úıdiń ornynda memlekettik - jekeshelik áriptestik aıasynda turǵyzylǵan jańa úıde barlyq jaǵdaı jasalǵan.

Kópbalaly otbasyǵa syılanǵan úsh bólmeli páterdiń aýmaǵy - 90 sharshy metr. Gaz, sý, elektr júıesimen qamtamasyz etilgen.

Osyndaı tosynsyı úshin Manar Búrkitova qýanyshtarynyń sheksiz ekendigin jetkizdi.



Onyń sózine qaraǵanda, eri Erjanmen birge jeti balany tárbıelep otyr. On alty jyldan beri páter jaldap kele jatqan otbasynda E.Búrkitov qana jumys jasaıdy. Úsh ul, tórt qyzdyń altaýy qaladaǵy №46 mektepte bilim alady. Úlken qyzy 16, kishi uly 3 jasta. Manar Keńesqyzy muǵalim bolǵanymen, ekinshi top múgedegi bolyp tanylǵan qyzynyń kútimimen úıde otyr.

Aıta keteıik, «Qaz-Hol» kompanııasy 2006 jyly qurylǵan. Sodan beri Oral qalasynda elýden astam úıdi salǵan.



Kópbalaly otbasylarǵa, múmkindigi shekteýli jáne basqa muqtaj jandarǵa qolushyn sozý maqsatynda óńirde bastaý alǵan «Meıirimdi kóktem» jobasy aıasyndaǵy jumystar budan keıin de jalǵasyn tabady.