«Jaqsylyq jasa» atty kreatıv ıdeıalardyń jastar battly ótkizildi

NUR-SULTAN. QazAqparat - Qazaqstanda Halyqaralyq qaıyrymdylyq kúnine arnalǵan «Jaqsylyq jasa» kreatıv ıdeıalardyń jastar battly uıymdastyryldy, dep habarlaıdy QazAqparat.

Shara «Arnaý» damý ortalyǵy» qoǵamdyq birlestigi «Jastar men balalar arasynda qaıyrymdylyqty dáripteý» jobasy aıasynda onlaın formatta ótti.

L.N. Gýmılev atyndaǵy Eýrazııa ulttyq ýnıversıtetiniń «Parasat» jáne E.A. Bóketov atyndaǵy Qaraǵandy ýnıversıtetiniń «QarMÝ» pikir-saıys klýbtary qaıyrymdylyq týraly oı qozǵap, belgili bir kózqarasty, ıdeıany dáleldep, berilgen taqyryp boıynsha máseleni sheshý joldaryn usyndy.

Zııatkerlik saıys barysynda komanda músheleri Qazaqstannyń jastar ortasynda qaıyrymdylyqty nasıhattaý boıynsha birqatar usynys aıtty, atap aıtqanda mektepterde qaıyrymdylyqtyń fakýltatıvtik kýrsyn engizý ıdeıasy aıtyldy.

Battl úsh raýndtan turdy: «Ideıalar qaqtyǵysy» (keıs taqyryptary – «Jastardy qaıyrymdylyqqa tartýdyń eń tıimdi joly», «Qaıyrymdylyqtyń eń paıdaly túri»; «Rýletka» (keıs taqyryby – «Balyq nemese Qarmaq», pozıtsııany qorǵaý jáne teriske shyǵarý); «Suraq-jaýap».

Battl jeńimpazy bir aptadan keıin qarapaıym kópshilik daýyspen anyqtalady. Daýys berý nátıjeleri jobanyń saıtynda jáne áleýmettik jelilerdegi resmı paraqshalarynda ornalastyrylady.

Battl Qazaqstan Respýblıkasy Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» KEAQ granty aıasynda júzege asyrylatyn «Jastar men balalar arasynda qaıyrymdylyqty dáripteý» áleýmettik jobasy sheńberinde ótkizildi.