#Jaqsylyq jasa: Aqtóbede órt sóndirý quraldary taratylyp, murjalar tazartylyp jatyr

AQTÓBE. QazAqparat - Aqtóbe oblysynyń tótenshe jaǵdaılar qyzmeti tegin órt sóndirý quraldaryn taratyp, úılerdiń murjalaryn tazartyp jatyr. Qaıyrymdylyq aktsııasyna arnaıy mekemeler kómektesti, dep habarlaıdy QazAqparat tilshisi.

Aqtóbe oblysynyń tótenshe jaǵdaılar departamenti respýblıkalyq «Jaqsylyq jasa» aktsııasyna qatysyp jatyr. Tótenshe jaǵdaılar qyzmetine órt sóndirý quraldary men dabyl qurylǵysyn osy saladaǵy kásipkerler alyp bergen. Qyzmetkerlerdiń ózi de qaıyrymdylyq aktsııasyna qarjy jınap, azyq-túlik pen balalarǵa syı daıyndady.

«Barlyǵy 45 otbasyǵa órt sóndirý quraly satyp alynyp, 35 otbasyǵa dabyl júıesi qondyryldy. Sonymen qatar, peshtiń aldyna temir tósenish qaǵylyp, murjalary tazartyldy. Al «Úmit» sábıler úıine arnaıy órt sóndirý qural-jabdyǵy syıǵa berildi. Oblys boıynsha 8 myńnan astam úıdiń turǵyndaryna nusqaý berilip, olarǵa aqparattyq habarlama taratyldy. Aktsııaǵa azamattyq qorǵaý organdarynyń 454 qyzmetkeri men departament apparatynyń jáne órt sóndirý qyzmetiniń áskerı qyzmetshileri tartyldy.Polıtsııa bólimderiniń qyzmetkerleri, memlekettik emes órtke qarsy qyzmet, órt sóndirý beketteriniń ókilderi, kommýnaldyq mekeme jumysshylary, «Jas Otan» Jastar qanatynyń, Jastar resýrstyq ortalyǵynyń, «Qyzyl Aı» qoǵamynyń volonterleri qatysty», - dep habarlady Aqtóbe oblysynyń TJD Órt qaýipsizdigi salasyndaǵy baqylaý jáne profılaktıkalyq qyzmet basqarmasy.

Qazirgi kezde baý-baqsha ujymdaryndaǵy úıler men aýyldarda túsindirý jumystary júrip jatyr. Taǵy 50 dabyl júıesin qondyrý josparda bar. Oqýshylar arasynda «Turmystaǵy órt qaýipsizdigi. Órt kezindegi tártip erejeleri» taqyrybynda ınteraktıvti sabaq ótkizildi. Aktsııa 5-naýryzǵa deıin jalǵasady.