#Jaqsylyq jasa: Aqmolalyq polıtseıler kópbalaly otbasyna kómek kórsetti
Vedomstvonyń málimeti boıynsha, tártip saqshylary Zerendi aýdanyndaǵy Ivanovka aýylynyń turǵyny Gúlnár Muqanovanyń úıinde boldy. Gúlnár jalǵyz ózi 4 balany tárbıelep otyr. Úlken uly Muhamat 11 jasta 5-synyp oqysa, kishi uly 4-te. Al, qyzdary Hadıdja men Fırýza 10 jáne 8 jasta. Qazirgi tańda kópbalaly ana jumyssyz, sondyqtan kómekke muqtaj.
Gúlnárdiń áleýmettik-turmystyq jaǵdaıyn estı salysymen polıtsııa qyzmetkerleri oǵan qıyn kezeńde materıaldyq kómek kórsetýdi sheshken. Tártip saqshylary qajetti azyq-túlik, tósek jabdyqtary jáne balalar kıimin satyp ápergen.
«Bul otbasyna kómektesý týraly bastamany biz birden qoldadyq. Aınalasy bir táýliktiń ishinde aqsha jınap, qajetti azyq-túlik satyp áperdik. Biz múmkindigi bar azamattardy muqtaj otbasylarǵa kómektesýge shaqyramyz», deıdi jedel áreket etý arnaıy otrıadynyń qyzmetkeri, polıtsııa leıtenanty Jaslan Japarov.
Óz kezeginde kópbalaly ana Gúlnár Muqanova da qıyn kezde kómek qolyn sozǵan polıtsııa qyzmetkerleriniń atyna analyq alǵysyn bildirýde.