Jaqsylyq Jarymbetov: Ábilıazov qyzmetkerlerdi qysymda ustady

ASTANA. QazAqparat - Almaty qalasynyń qylmystyq ister jónindegi aýdanaralyq mamandandyrylǵan sotynda BTA banktiń burynǵy basshysy Muhtar Ábilıazovtiń isi boıynsha sottalýshylardan jaýap alý jalǵasýda. Búgin BTA banktiń basqarma tóraǵasynyń burynǵy birinshi orynbasary Jaqsylyq Jarymbetov jaýap berdi.

Ol óz sózinde BTA Bankte Ábilıazovtyń jumys isteý ádisterine tyńǵylyqty toqtaldy.

«Ábilıazov birleýlerdi qorqytatyn, jazalaıtyn, keıbireýlerin qaımyqtyratyn, ózara birine-birin qarsy qoıatyn. Banktegi qyzmeti kezinde onyń ádisteri ózgergen joq. Ol jumysqa adamdardy májbúrlep nemese yntalandyryp tarta bastady (...). Ábilıazov bankti jeke ózi basqarǵanyn barlyǵy biledi»,-dep toqtaldy Jarymbetov.

Aıypkerdiń sózine qaraǵanda, Ábilıazov shetelde jasyrynyp júrgen banktiń top-menedjerlerin aıanbaı qarjylandyrdy. Sonymen birge ol óziniń qaramaǵynda istegenderdiń QR aýmaǵynan tys shyǵýyna bastamashy bolyp, uıymdastyrǵan.

«2009 jyldaǵy oqıǵadan keıin Ýkraınada bolǵan Qaırat Sadyqov (BTA banktiń nesıeleý boıynsha burynǵy dırektory) ózge «qashqyndar» sekildi aı saıyn 10 myń dollar somasynda jalaqy alyp otyrdy»,-dedi ol.

Jarymbetovtyń aıtýynsha, atalǵan adamdarǵa aı saıynǵy tólem 2012 jylǵa deıin jalǵasqan, keıinnen Ábilıazov bul adamdar ózderiniń mıssııasyn oryndady dep sheship, jalaqy tóleýdi doǵarǵan.

Sonymen qatar Áblıazov jumystan bosatylatyn kezinde BTA banktiń burynǵy basqarma tóraǵasy Sadýaqas Mámeshke 10 mln. dollar tólegen eken. Budan bólek ol banktiń ózge de basqarma músheleri sekildi jyl saıyn resmı jáne resmı emes bonýstar alǵan.

Jaqsylyq Jarymbetov óz sózinde Ábilıazov ony jańylystyrǵanyn taǵy da qaıtalap ótti.

«Men kinálimin jáne ony moıyndaımyn. Men Ábilıazovtyń tapsyrmalaryn oryndadym. Ol meni jańylystyryp, adastyrdy»,-dedi ol.