Jaqsylyq Úshkempirov Nursultan Nazarbaevqa armanyn jetkizdi

  ASTANA. QazAqparat - Búgin Aqordada Qazaqstan Prezıdenti Nursultan Nazarbaevtyń qolynan «Qazaqstannyń Eńbek Eri» ataǵyn alǵan Jaqsylyq Úshkempirov armanyn aıtty, dep habarlaıdy QazAqparat.

Marapattaý rásiminen keıin sóz alǵan Olımpıada chempıony Jambyl aýdanyna qarasty bir aýylǵa gaz tartqyzyp, sport keshenin, balabaqsha, qoljetimdi páterler saldyryp bergenin aıtty.

«Meniń bir armanym bar. Osy kóp bolsa 5 myńnan asa aýyl bar shyǵar. Sony qazaqtyń 5 myń jigiti kóterip jiberse, odan artyq qandaı baqyt kerek. Men sony oılaımyn», - dedi Jaqsylyq Úshkempirov Elbasyna qarata.

Óz kezeginde Memleket basshysy Táýelsizdik jyldarynda biraz azamattyń qaltaly bolǵanyn aıta kele: «Endi tapqanynyń birazyn elge berse, sen sııaqty. Jas otbasylarǵa 50 páterli úı salyp berdiń. Balabaqsha salyp berdiń. Sport keshenin saldyń, qazir 200 bala kúresip jatyr», - dedi.

Aıta keteıik, Jaqsylyq Úshkempirov - KSRO-nyń eńbek sińirgen sport sheberi, Qazaq KSR eńbek sińirgen jattyqtyrýshysy, Qazaq KSR erkin kúres boıynsha chempıony, Álem chempıony (1981), Álem kýbogynyń kúmis júldegeri (1980), Keńes odaǵy birinshiliginiń eki dúrkin jeńimpazy (1975, 1980), Olımpıada chempıony.