Jaqsylyq Úshkempirov: Nebir jas chempıondar aýylda júr
«Prezıdent Qasym-Jomart Kemeluly óziniń Joldaýynda balalar úshin sport keshenderiniń qoljetimdi bolýyn erekshe atap ótkeni belgili. Mine, biz osy tapsyrmasyna jiti mańyz berýimiz kerek. Sebebi, qalalardan bólek, aýylda nebir jas chempıondar júr. Bárimiz aýyldan shyqtyq. Bala kezden tamaǵy toq, aýyldyń jumysyna myǵym balanyń sportta baǵyndyrar shyńy bıik. Tek sol jetkinshekterdi durys baǵyttap, jeńis dámin tatqyzyp jiberetin sport zaly men bilikti jattyqtyrýshy bolýy kerek», - deıdi Jaqsylyq Úshkempirov.
Sport ardageri sonymen birge Nur-Sultan qalasynda kúres túrlerinen ótken Álem Chempıonatynyń uıymdastyrylýyn joǵary baǵalady.
«Mundaı Álem chempıonatyn ótkizý – kez kelgen memleket úshin úlken mártebe. Kelesi jyly Tokıoda ótetin Olımpıada aldynda bul da bir daıyndyqty pysyqtaý dep bilemin. Tórtjyldyqtyń basty básekesi – Olımpıada oıyndaryna 8 joldama utyp alýdyń ózi sportshylarymyzdyń básekege qabilettiligin bildiredi. Iıa, altyn medaldan úmitti bolǵanymyz ras, degenmen, ókinishke oraı, altyn buıyrmady. Sebebi, sportshylardyń deńgeıi óte joǵary boldy. Dese de, uıymdastyrý jaǵynda eshqandaı min joq. Basqa Álem chempıonattaryn kórip júrmin, úıdegi týrnırdiń bási basqalardan joǵary ekenin moıyndaımyn. Uıymdastyrýshylar barlyq jaǵyn jaqsylap oılastyrǵan»,-dedi Jaqsylyq Úshkempirov.
Aıta keteıik, 2019 jyldyń 14-22 qyrkúıek aralyǵynda Nur-Sultan qalasynda grek-rım, erkin jáne áıelder kúresinen álem chempıonatyn ótti. Nur-Sultandaǵy álem birinshiligi 2020 jylǵy Tokıo Olımpıadasynyń lıtsenzııasy úlestirilgen alǵashqy irikteý týrnıri boldy. El qorjynynda 3 kúmis, 4 qola, 8 olımpıada joldamasy bar.
Eske sala ketsek, Memleket basshysy Qasym-Jomart Toqaev buqaralyq sportty damytýda keshendi baǵdarlama qabyldaý kerektigin jetkizip, balalar úshin sporttyq ınfraqurylymnyń barynsha qoljetimdi bolýyn qamtamasyz etý kerektigin atap ótken edi.