«Jaqsylyq Dosqalıev: Meniń mańdaıyma jazylǵan taǵdyr osy eken...» - BAQ-qa sholý
***
«Búgingi zaman «Tańǵy násip - táńirden» dep jaıbaraqat jatatyn jaıdaq zaman emes. Alýan maqsattaǵy aqparattardy erteli-kesh erkin jamyratqan, bútindi bólshekke, bólshekti shań-tozańǵa aınaldyrýǵa asyqqan alaıaq zaman. Sondyqtan bolar, kózi ashyq, kókiregi oıaý jurt «Álemde aqparat soǵysy júrip jatyr» dep jar salýda», - dep jazady Májilis depýtaty Aldan Smaıyl «Egemen Qazaqstan» gazetiniń búgingi sanynda jarııalanǵan «Bul - jaıbaraqat jatatyn jaıdaq zaman emes» degen taqyryptaǵy maqalasynda. Maqala avtorynyń jazýynsha, bul soǵystyń ulttyq mádenıetke qarsy agressııa, ekonomıkalyq aqparat agressııasy, beıbit úreılendirý, psıhologııalyq úreılendirý, aqyldyń aqparattyq soǵysy, «ulttyń erik-jigerine qarsy operatsııa», «ulttyq mádenıetter deńgeıindegi operatsııa» dep atalatyn baǵyttary bar.
Elordada ótip jatqan VI Astana ekonomıkalyq forýmy keshe odan ári jalǵasty. Bul kúni halyqaralyq deńgeıde mańyzdy bolyp tabylatyn, elimizdiń ekonomıkalyq áleýetin álemge pash etken birqatar sharalar ótkizildi. Sonyń biri - IV «Astana Invest 2013» forýmy boldy. Onyń jumysyna elimizdiń Premer-Mınıstri Serik Ahmetov, Astana qalasynyń ákimi Imanǵalı Tasmaǵambetov, Frantsııanyń Syrtqy saýda mınıstri Nıkol Brık jáne basqa da tanymal tulǵalar qatysty. Osy jaıt arqaý bolǵan maqala «Egemen Qazaqstan» gazetinde «Uqsamaıtyn basqaǵa, erekshe qala Astana» degen taqyryppen berilgen. «Memleket basshysynyń zor qoldaýynyń nátıjesinde bizdiń elimizde ǵana emes, sonymen qatar, elimiz ornalasqan óńirdegi iri saıası, ekonomıkalyq ortalyqtardyń biri retinde qalyptasyp otyrǵan Astananyń ekonomıkalyq, iskerlik jáne adamı áleýeti ınvestıtsııalar úshin barǵan saıyn tartymdy bola túsýde. Munda perspektıvaly óndiristerdi qurýdyń, zııatkerlik qyzmet salasyn damytýdyń jańa sharalary júzege asýda. Onyń ústine qalanyń Eýrazııalyq alyp keńistiktegi qolaıly ornalasýy onyń úlken kommýnıkatsııalyq múmkindikterin de asha túsýde. Elorda osynda kóshirilgennen beri qaladaǵy halyq sany úsh ese ulǵaıyp, 800 myń adamǵa jetýi, qala qurylysynyń óte qarqyndy jaǵdaıda damýy sonyń naqty dálelderiniń biri bolyp tabylady», - dedi Premer-Mınıstr.
***
«Aıqyn» gazetiniń búgingi sanynda burynǵy Densaýlyq saqtaý mınıstri Jaqsylyq Dosqalıevpen aradaǵy suhbat «Meniń mańdaıyma jazylǵan taǵdyr osy eken...» degen taqyryppen berildi. Basylym tilshisiniń barlyq saýalyna tuşymdy jaýap bergen ol: «Men sotta Ahmet Baıtursynovtyń da sózderin aıttym. Ol kisi kóp qýdalanǵan. Bizden artyq qıyndyq kórgen. Bir óleńinde ol: «Qınamaıdy abaqtyǵa japqan. Qıyn emes darǵa asqany, atqany! Maǵan aýyr osylardyń birinen - Óz aýylymnyń ıtteri úrip, qapqany» degen eken. Meniń de basymnan soǵan uqsas oqıǵa ótti. Birge jumys jasaǵan prorektor belshesinen bylyqqa batyp, bárin maǵan jaba saldy», - deıdi.
Osy basylymnyń jazýynsha, Almatyda ótken ǵasyrdyń 30-60 jyldary aralyǵynda salynyp, búginde tozyǵy jetken, qalanyń sánin ketirip turǵan úıler myńnan asady eken. Kóp jyldan beri jóndeý kórmegen mundaı úılerde 50 myńǵa jýyq halyq turady. Keńes zamanynda karkastan salynǵan baspanalar búginde qıraýdyń aldynda, ómirge qaýipti bolyp tur. Sondyqtan 2012 jyldyń aqpan aıynda qalanyń turǵyn úı qoryn jańartý maqsatynda eski úılerdi syryp, ornyna jańa ǵımarattar salý jóninde 3 jylǵa arnalǵan baǵdarlama qabyldanǵan. Keshe qala ákimi Ahmetjan Esimov Túrksib aýdanynda bolyp, atalǵan baǵdarlama boıynsha turǵyzylǵan alǵashqy úılerdiń jaǵdaıymen tanysyp qaıtqan. Maqala «Eski páterge - jańa baspana» degen taqyryppen berilgen.
***
«Shyǵys Qazaqstan oblysynda sońǵy ýaqyttaǵy sanktsııalanbaǵan eń iri sherýlerdiń biri ótti. Shyǵys eldi mekeninde turatyn júzdegen oralmandar ózderiniń aryzdaryn oblys ákimi Berdibek Saparbaevqa jetkizbekke sheshim qabyldady», - dep jazady ««Vremıa» gazeti «Temnaıa dlıa oralmanov» degen taqyryptaǵy maqalasynda. Basylymnyń atap ótýinshe, aýyl turǵyndary jaryqqa aqsha tólemegendikteri úshin elektr energııasynsyz qalǵan. Olardyń memleketke qaryzdary shamamen 46 mln. teńgege jetip otyr.