«Jaqsydan qalar jarqyn iz» atty kesh jazýshy Sara Latıevaǵa arnaldy

ORAL. QazAqparat - Qadyr Myrza Álı atyndaǵy mádenıet jáne óner ortalyǵynda belgili qalamger, Qazaqstan Jazýshylar jáne Jýrnalıster odaqtarynyń múshesi, halyqaralyq «Alash» ádebı syılyǵynyń ıegeri Sara Latıevanyń 70 jasqa tolýyna oraı «Jaqsydan qalar jarqyn iz» atty kesh ótti, dep habarlaıdy «QazAqparat» tilshisi.

Bókeı ordasy aýdany Han ordasy aýylynda 1947 jyly dúnıege kelip, Almatyda 1969 jyly QazMÝ-dyń jýrnalıstıka fakýltetin bitirgennen keıin osy salada jemisti qyzmet atqarǵan Sara Latıeva «Men soǵysty kórgenim joq», «Bulbul», «Hadısha Bókeeva», «Tóreligin ózderiń aıtyńdar», «Týǵan jerdiń tútini» syndy kitaptar jazyp, ádebıetke de aıtýly úlesin qosty. Kúlásh Baıseıitova, Hadısha Bókeevadaı biregeı tulǵalarmen kezdesip, olardyń ómiri men shyǵarmashylyǵy týraly kitap jazǵan qalamgerdiń esteligi erekshe áserli boldy.

Mereıtoı ıesine aqyndar, Qazaqstan Jazýshylar odaǵy BQO bólimshesiniń tóraıymy Aqushtap Baqtygereeva, Qadyr ortalyǵynyń dırektory Baýyrjan Halıolla yqylas-nıetterin bildirip, ıyǵyna qamzol japty. Oblys ákimi Altaı Kólginovtiń alǵyshaty tabys etildi.

Tanymal dombyrashy, QR eńbek sińirgen mádenıet qyzmetkeri Ermek Qazıev aq tilegin arnap, Dınanyń «Bulbul» kúıin tartyp berdi. Qazaqstannyń eńbek sińirgen ártisi Jumaǵanym Rahımova, «Eren eńbegi úshin» medaliniń ıegerleri Jaskeleń Ǵaısaǵalıev pen Dastan Esentemirov, respýblıkalyq baıqaýlardyń laýreaty Ernar Ómiráli syndy ánshiler de keshtiń kórkin ádemi ándermen kótere tústi.