Jaqsybekov qazaq fýtbolyna ne berdi? - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 19 jeltoqsan, juma kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

"Pavlodar oblysynda taǵy bir mys baıytý zaýyty ashyldy", dep jazady "Egemen Qazaqstan" gazeti.

"Ekibastuzda aıaq basqan jeriń tas-kómir, kenge toly. Aınalasy óndiriske toly Álkeı Marǵulan aýyly, «Aıaq Qojan» ken orny... «Fonet Er-Tai AK Mining» JShS-ine qarasty taǵy da bir ken baıytý fabrıkasy ashyldy. Óndiris jylyna 500 myń tonna ken men 26 myń tonna mys flotokontsentratyn shyǵarady", - delingen "26 myń tonna mys!" atty maqalada.

Kásip­oryn elimizdiń Údemeli ın­dýs­trııalyq-ınnovatsııalyq damý baǵ­­darlamasynyń Indýs­trııa­lan­dyrý kartasyna engen. Jalpy, ındýstrııalandyrý baǵdarlamasy aıasynda bul kúnderi óńirde quny 1 trıllıon teńge turatyn 85 joba iske asyrylýda.

***

"Aıqyn" basylymynyń búgingi sanynda tarıh ǵylymdarynyń doktory, professor Talas Omarbekovtiń "Tarıhtyń túp qazyǵy Qazaq handyǵy bolýy tıis" atty taqyryppen suhbaty jarııalandy. Qazaqstan memlekettiliginiń 550 jyldyǵy, tarıh týrasynda órbigen áńgime jańa derektermen astasyp jatyr.

"Biz qazir Batys túrik qa­ǵanaty dep atap júrgenimiz, shyn máninde on oq eli bolatyn. Bylaısha aıt­qanda, 10 taı­pa­dan quralǵan memlekettik júıe. Bul bir kezde túrkeshter, taǵy bir tus­ta qarluq­tar dep te ataldy. Máselen Shyń­ǵys­hanǵa qatty qarsylyq kórsetip uzaq soǵysqan naıman memleketi «naıman han­dy­ǵy», kereı memleketi «kereı handyǵy» atal­­dy. Osy kúnge deıin osy jaǵyn naqty aıtpaı ke­le ja­tyr­myz. Aıtýymyz kerek. Bizdiń mem­­le­­ket­tik júıemizdiń, bizdiń kóshpeli qo­ǵam­­nyń, kóshpeli memlekettik saıası qoǵam­dyq qu­ry­lymnyń ereksheligi osynda. Qysqasy, memlekettik júıe belgili bir taı­pa­lardyń bas­shy­lyǵymen qalyp­tas­qan. Elimizdiń aına­lamyzdaǵy kórshilerge qaraǵanda ózin­dik basqarýy, ózindik damý joly boldy. Jalpy aıtqanda, qazaq handyǵy - qazaq mem­le­ketiniń shyqqan shy­ńy, joǵarǵy bıigi. Qazaq handyǵy ómir­sheń­digin kórsetti, myq­ty­lyǵyn tanytty. Ke­she­gi Kenesary basta­ǵan qazaq handyǵynyń Reseı sekildi oty­ryq­shy elge qarsy tura alýy, Abylaıhan sekildi tulǵa basqarǵan eldiń Qytaıdaı alyp elmen alysyp, ózimen sanastyra bi­lýi jaı sharýa emes. Qazaq han­dyǵynyń myqtylyǵy, jumylǵan ju­dyryq­taı kúshtiligi", - deıdi Omarbekov.

Qazaqstan fýtbol federatsııasyn 7 jyl basqarǵan Ádilbek Jaqsy­bekov óz erkimen otstavkaǵa ketetinin málimdedi. Jaqsybekov tizgindegen 7 jylda el fýtbolynda ne ózgerdi? Alǵa basqan qadamymyz qansha, artqa ketkeni she? Osy saýaldarǵa "Aıqyn" jaýap izdep kórgen. Avtor Qazaqstan quramasynyń burynǵy jáne búgingi shama-sharqyna, jetistikteri men toqyraý kórgen tustaryna, legıonerler men bapkerler taqyrybyna, ınfraqurylym men bıik maqsattar jáne 2026 jyly álem chempıonatyn Qazaqstanda ótkizý týraly máselelerge egjeı-tegjeıli toqtalǵan. Tolyǵyraq "Jaqsybekov qazaq fýtbolyna ne berdi?!" atty maqaladan oqı alasyzdar.

***

Soltústik kórshilerimizge arzan kólik satyp alýǵa aǵylǵan qazaqtardy Reseı reketırleri bopsalaýǵa kiristi, dep jazady "Ekspress K" gazeti. "Lıhıe ız 90-h" atty maqalada atap kórsetilgenindeı, bandıtter "alym-salyqty" aqshamen nemese temir tulparmen alady. Kelispegenderdi soqqyǵa jyǵyp, "kók-ala qoıdaı" sabap ketip otyrady.

"Shekaraǵa jaqyn qalalarda reketırler beleń alǵan. Olar tıimdi baǵamen kólik satyp alýǵa kelgen qazaqstandyqtardy tonaýmen aınalysyp júr", - dep jazady basylym.