«Jaqsy adam» jeńimpazy: Ár azamattyń mindeti – eline qorǵan bolý

<p>Jaqynda Jibek joly telearnasy kórermen kózaıymyna aınalǵan &laquo;Jaqsy adamdarym&raquo; baǵdarlamasyn qorytyndylap, el ishinde erligimen, erekshe qaısarlyǵymen, tanylǵan búgingi kúnniń batyrlaryn marapattaǵan edi. Olardyń arasynda polıtsııa aǵa leıtenanty Nursultan Temirbolat ta bar. Nursultan balalardy qabaǵan ıtten qutqaryp qaldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Nursultan Temirbolat – Astana qalasy PD Jedel qımyldaıtyn arnaıy jasaǵy arnaıy motorlanǵan bóliminiń ınspektory.

Ol 1991 jyly Almaty qalasynda týǵan. QR ІІM M. Bókenbaev atyndaǵy Aqtóbe zań ınstıtýtynda bilim alǵan. Otbasy, bir balasy bar.

«Bul oqıǵa 4 aı buryn Astana mańyndaǵy Kóktal shaǵynaýdanynda boldy. Jumystan kelip, anama dári kerek bolǵandyqtan formamdy aýystyryp, qaıtadan kóshege shyqtym. Munda jer úıler kóp, balalardyń sabaqtan kele jatqan sáti. Sonda úlken alabaı ıttiń qalaýsyz júrgenin kórdim. Bala kúnimde kóz aldymda synyptasymdy ıt talap, aýrýhanaǵa túsken edi. Sodan beri qaraýsyz júrgen ıtterge mindetti túrde mán beremin», - dep eske alady keıipkerimiz.

Sol mezette Nursultan kóliginen shyǵyp, qabaǵan ıttiń sońynan júgiredi. Qolyna ilikken kesek taspen ony qaımyqtyryp, sol mańaıda turǵan traktordyń qasyna qýalap ákelgen.

«Kóshede balaly áıelder, mektep oqýshylary kóp edi. Al ıt óte agressıvti boldy. Sol sátte qoryqtym ba, esimde joq. Birinshi kezekte balalardy oıladym. Onyń nazaryn ózime qaraı aýdaryp, jaqyn mańdaǵy traktor qasyna ákelip qamadym. Kóp uzamaı oqıǵa ornyna jergilikti ýchaskelik polıtsııa ınspektory men ıt aýlaıtyndar keldi. Jumys barysynda da qaraýsyz ıtterdiń shabýyly oqıǵasyn jıi estımiz, bul óte ózekti másele», - deıdi N. Temirbolat.

Ol polıtsııa qyzmetkeriniń jumys babynda ǵana emes, jumystan tys ýaqytta da el qorǵany bolý kerektigin aıtýda. Tipti demalys kezinde de jaǵajaıda sýǵa ketken adamdardy qutqaratyn kezderi bolǵan.

«Jumysta da kóp adamdy qutqaratyn, syn-qatermen betpe-bet keletin sátter bolady. Ony tolyqqandy aıtyp otyrý jaramas, bul meniń jumysym. Jalpy kez kelgen adam aınalasyna qolynan kelgenshe kómek kórsetýi kerek dep esepteımin», - deıdi keıipker.

Aıta keteıik, Jańa jyl qarsańynda, 30 jeltoqsanda Jibek Joly telearnasynan «Jaqsy adam-2023» arnaıy syılyǵynyń arnaıy telenusqasy kórsetiledi.