Jaqynda Qazaqstan men Qytaı transshekaralyq sý resýrstaryn bólý kelisimin bekitýi múmkin

<p>ASTANA. KAZINFORM &ndash; Qazir Qazaqstan men Qytaı eki el arasyndaǵy transshekaralyq sý resýrstaryn bólý týraly kelisimniń jobasyn ázirlep jatyr. Jaqyn arada bul qujat bekitilýi múmkin. Bul týraly QR Sý resýrstary jáne ırrıgatsııa birinshi vıtse-mınıstri Bolat Beknııaz málim etti.</p>

«Jalpy, Ortalyq Azııa elderimen jáne Reseımen tıisti sharttar bar. Qazir Qytaımen arada sý bólý boıynsha kelisim jobasyn pysyqtap jatyrmyz. Ázirge, oǵan qol qoıylmady, ıaǵnı bekitýge jaqyndap qaldyq. Osy qujat jobasyn biraz jyldan beri talqylap kelemiz. QHR-men arada transshekaralyq 25 ózen bar, sonyń ishinde ekeýinde ǵana aǵyn kólemin bilemiz. Osy eki ózende gıdrobeketter boldy. Al qalǵanynda tıisti jabdyqtar eskerilmegen», - dedi B.Beknııaz elordada ótken jıynda tilshiler suraǵyna jaýap bere otyryp.

Onyń aıtýynsha, bul baǵytta zertteýler uıymdastyryldy. 

Foto: Soltan Jeksenbekov/Kazinform

«Bizdiń mamandar Qytaıǵa saparlady, sondaı-aq kórshi eldiń sarapshylary bizge keldi. Birlesip búkil ózenderdi zerttedik. Atalǵan kelisimdi bekitý úshin osy ózenderge qatysty naqty derekterdi anyqtaý kerek. Qazir qansha sý keletinin bilip otyrmyz», - dedi vıtse-mınıstr.

Budan buryn habarlanǵandaı, Qazaqstanda sý sektoryn damytý boıynsha seriktesterdiń Úılestirý keńesi quryldy. Oǵan Sý resýrstary jáne ırrıgatsııa mınıstrliginiń, BUU Damý Baǵdarlamasy (BUUDB) men halyqaralyq uıymdardyń, qarjy ınstıtýttarynyń, donorlyq qaýymdastyqtardyń jáne basqa da birqatar qurylymdardyń ókilderi kiredi.