Jahanger jahandy baǵyndyrǵysy keledi: 10 jasar bala mánerlep syrǵanaýdan talaı jarysta top jaryp júr

ÓSKEMEN. QazAqparat – Kúni keshe Almatyda ótken mánerlep syrǵanaýdan Qazaqstan Respýblıkasynyń kýboginde óskemendik Jahanger Ábilqasymov jeńis tuǵyrynan kórindi. 10 jasar balaqaıdyń buǵan deıin de jetken jetistikteri az emes. Bolashaǵynan zor úmit kúttiretin jas óren Denıs Ten sekildi Olımpıadada el abyroıyn asqaqtatqysy keledi. QazAqparat tilshisi Jahangerdiń ózimen de, anasymen de tildesip kórgen edi.

Qyzyǵýshylyǵy qalaı oıandy?

Óskemen qalasynda dúnıe esigin ashqan Jahanger qazir Almatydaǵy Denıs Ten atyndaǵy Global Figure Skating mənerlep syrǵanaý akademııasynda oqyp jatyr.

Balanyń mənerlep syrǵanaýǵa degen qyzyǵýshylyǵy qalaı oıanǵanyn anasy Gúldana Ábilqasymova aıtyp berdi.

- Ulym 8 jasyna deıin eshqaıda qatyspady. Arasynda taekvandoǵa, bıge, akrobatıkaǵa berip kórgenmin. Alaıda barǵysy kelmedi. Sodan 2020 jyly mənerlep syrǵanaýǵa apardym. «Áýeli konkı teýip kórshi» dedim. Kórdi, unatty. Ýaqyt ótken saıyn qyzyǵýshylyǵy arta tústi. Tipti úıde tek mənerlep syrǵanaý týraly aıtatyn boldy, - deıdi ol.

Úsh aıdyń ishinde Jahanger muzda sekirip aýada bir jarym ret aınalýdy úırendi. Qolynan keletinin sezgen soń odan saıyn qyzyqty.

Basqa balalar úıde teledıdar men telefonnan mýltfılm kórse, ol azannan keshke deıin mənerlep syrǵanaý týraly vıdeolardy tamashalaıdy eken.

Jalyqpaıdy, kerisinshe aldyna bıik maqsat qoıady.

- Kerek deseńiz kúnine 24 saǵatyn mənerlep syrǵanaýǵa arnaýǵa daıyn. Onyń bir nársege osynshalyqty qyzyqqanyn kórmeppin. Qysqa ýaqytta tehnıkasyn shyńdap, denesin shynyqtyryp aýada 2 jarym ret aınalatyn deńgeıge jetti. Túrli jarystarǵa da qatysyp, únemi júldeli oryndardy alyp júrdi, - deıdi Gúldana Ábilqasymova.

Jahanger mánerlep syrǵanaýdan Shyǵys Qazaqstan oblystyq dodasynda 3 márte jeńimpaz atanǵan. Óńirde aldyna jan salmaǵan soń respýblıkalyq jarystarǵa jol tartty.

Eń alǵash ret 2021 jyly Shymkent qalasynda ótken QR chempıonatynda úshinshi oryn alǵan. Odan soń Almaty, Qostanaı, Astana qalalaryndaǵy jarysta baq synap kórdi.

Byltyr respýblıkalyq chempıonat Óskemende uıymdastyrylǵan bolatyn. Sol kezde týǵan jerinde baq synaǵan balaqaı ekinshi oryndy ıelendi.

- Mánerlep syrǵanaýdyń jarqyn juldyzy bolǵan Denıs Ten meniń kýmırim. Ózim jattyqqan «Zvezdnyı» klýbynyń sportshylary eki jyl buryn elordada Denıs Tendi eske alýǵa arnalǵan mánerlep syrǵanaýdan halyqaralyq týrnırdiń jabylý rásimine qatystyq. Sonda maǵan jeke óner kórsetýge múmkindik berildi. Qýanyshymda shek bolmady! Árıne, qobaljydym. Sol sátti eshqashan umytpaımyn. Endi bastalǵan jeke mansabymdaǵy eń jarqyn sátterdiń biri desem de bolady. Meni qoldap, senim artqan jattyqtyrýshylaryma rahmet!, - deıdi Jahanger Ábilqasymov.

«Balamnyń baqytty bolǵanyn qalaımyn»

Óz sózinde ol Denıs Ten sekildi Olımpıadada el abyroıyn asqaqtatqysy keletinin jetkizdi. Álemniń talaı jerin sharlap, bıik belesterdi baǵyndyrýdy qalaıdy.

- Byltyr balam Almatydaǵy Denıs Ten atyndaǵy Global Figure Skating mənerlep syrǵanaý akademııasyna túskisi keletinin aıtty. Talpynysyn, talabyn kórip turyp qalaı qarsy bolaıyn?! Kez kelgen ana baýyr eti balasynyń baqytty bolǵanyn, qalaǵanyna qol jetkizgenin qalaıdy ǵoı. «Bárine shydaımyn, úırengim keledi» dedi. Sodan kelisimimdi berip, akademııaǵa túsýge qujattardy daıyndaı bastadyq. Oqýǵa qabyldanǵan soń jalǵyz jibermeı, ózim de kóship baratyn boldym, - deıdi anasy.

Gúldana Ábilqasymova - jalǵyzbasty ana. 4 balasy bar, eki ul, eki qyz. Jahanger ekinshisi. Úlken qyzy – 14-te, kenje uly – 2 jasta.

- Sodan eki qyzymdy Óskemende ata-apasynyń qasynda qaldyryp, uldarymmen Ońtústik astanaǵa attandyq. Jahanger 2022 jyldyń kyrkúıeginen akademııada oqýda. Páter jaldap turyp jatyrmyz. Ózim sol akademııa mańyndaǵy janarmaı beketinde kassır bolyp jumysqa ornalastym.Shyǵys Qazaqstandaǵy tústi metallýrgııa kásiporny - «Kaztsınk» JShS balamnyń bolashaǵyna senip, qarjylaı qoldaý kórsetýde. Basqa da demeýshiler qarastyryp jatyrmyz, - deıdi Gúldana Ábilqasymova.

Denıs Tenniń sheshesi Oksana Ten Jahangerge «Seni burynnan baqylap júrmiz. Bizge keletinińdi sezip edim» depti.

Búginde balanyń júzi bal-bul jaınap, eki ezýi únemi eki qulaǵynda júredi. Sebebi asqaq armany oryndalyp keledi.

- Muzda sekirýdiń jańa túrin shyǵaryp, mənerlep syrǵanaý sportynda óz atymdy qaldyrsam deımin. Qazir aýada 3 jarym ret aınalýdy meńgerýdemin. Álemdik rekord – 4,5. Keleshekte aýada 5 jarym ret aınalyp osy rekordty jańartqym keledi, - deıdi 10 jasar sportshy.

2023 jyldyń aqpan aıynyń 21-i kúni Almatyda mánerlep syrǵanaýdan Qazaqstan Respýblıkasynyń kýbogi ótti. Sol jarysta Jahanger barlyǵynan basyp ozyp, birinshi oryndy ıelendi.

Bul jeńis jas órenniń jańa jetistikterine jol asha túsedi dep senemiz!