Jahandyq jylyný jyldamdyq alyp jatyr – BUU dabyl qaqty

JENEVA. QazAqparat – Ǵalamshardyń barlyq aımaqtarynda klımattyń ózgerýi baıqalýda. Bul protsess jyldam qarqyn alyp, onyń saldary orny tolmas jaǵdaılarǵa ákelýde. Bul týraly Jenevada jarııa etilgen Klımat boıynsha úkimetaralyq sarapshylar tobynyń baıandamasynda aıtyldy, dep habarlaıdy QazAqparat BUU Jańalyqtar ortalyǵyna silteme jasap.

Orny tolmaıtyn qaýipti ózgerister

Búginde adamzat qyzmetiniń qatysýymen bolǵan jahandyq jylyný ǵalamshardyń barlyq aımaqtarynda ekstremaldyq aýa raıynyń kóptegen jaǵdaılarynyń oryn alýyna ákelgen. Budan bólek, ǵalymdardyń málimetterinshe, Jer ǵalamsharynyń barlyq klımattyq júıesi ózgerip, bul ózgerister atmosfera, teńizder, Jerdiń muz qabyqtary men topyraq betine áser etip otyr. Bul ózgeristerdiń kóbi orny tolmas qaıǵyly jaǵdaılarǵa sebep bolýda.

Alaıda baıandama avtorlary, ıaǵnı 66 eldiń 234 sarapshysy adamzat klımattyń ózgerýine áli de bolsa óziniń oń áserin tıgizetinine senimdi. Ol úshin atmosferaǵa zııandy zattar, sonyń ishinde parnıktik gazdyń shyǵarylýyn azaıtyp, sol arqyly aýanyń sapasyn qysqa merzim ishinde aıtarlyqtaı jaqsartyp, jahandyq temperatýrany turaqtandyrýǵa bolady.

Adamzat úshin dabyl belgisi

BUU Bas hatshysy Antonıý Gýterrıshtiń pikirinshe, Jumys tobynyń baıandamasy – búkil adamzat úshin dabyl qaǵý belgisi. «Bul - qatty dabyl, al usynylǵan kýálikter daýsyz», - dep túsindirdi ol ǵalymdardyń tujyrymyn.

Ol halyqaralyq qaýymdastyqtyń jahandyq jylynýdy 1,5 gradýstan aspaıtyn deńgeıde ustap turýǵa keliskenin, alaıda aldaǵy ýaqytta shuǵyl sharalar qabyldanbasa, ol shamadan asyp ketetinin eske saldy.

«Buǵan qalaı bolǵanda da jol bermeýimiz kerek», - dep eskertti Gýterrısh.

Ol qarashada Glazgoda ótetin klımat jónindegi konferentsııa qarsańynda ásirese Jıyrmalyq topqa kiretin barlyq elder klımattyń ózgerýine qarsy kúreske beıildiligin rastap, «nóldik shyǵaryndy» koalıtsııasyna qosylýy tıis ekenin atap ótti.