Jahandyq jastar týrızmi sammıtine Qazaqstan atynan eki oqýshy qatysady

NUR-SULTAN. QazAqparat – Qazaqstandyq eki oqýshy Ábdirahman Serikqalı men Dınara Zamantaeva Italııanyń Sorrento qalasynda ótetin ıÝNVTO jahandyq jastar týrızmi sammıtinde elimiz atynan óner kórsetedi, dep habarlaıdy QazAqparat.

QR Mádenıet jáne sport mınıstri Dáýren Abaevtyń aıtýynsha, qos oqýshy óte daryndy ári talantty.

«...Ekeýi de oqýlarynda ozat, ana tilinde erkin sóıleıdi, aǵylshynshalary sýdaı.

Abdrahman tipti, kınoǵa túsip, PVE kınoakademııasynyń «Úzdik er adam róli» nomınatsııasynyń jeńimpazy atanyp ta úlgergen. «Jasandy ıntellekt» taqyrybynda jeke joba da qorǵap tastaǵan. Sýǵa júzýdi unatady eken.

Al Dınara bolsa – ózi oqyp jatqan mekteptiń Prezıdenti.

Birneshe márte respýblıkalyq pikirsaıys týrnırleriniń jeńimpazy, volonter, ıÝNESKO klýbtary ulttyq federatsııasynyń múshesi.

Bir sózben aıtqanda ekeýi de alǵyr, bilimdi, naǵyz zııatker oqýshylar.

Osyndaı jastarymyz barda elimizdiń erteńine qashanda senimmen qaraýǵa bolady», - dep jazdy mınıstr Facebook-te.