Jahandyq syn-qaterlerdi sheshý maqsatynda Astanada jańa halyqaralyq forým ótedi

ASTANA. QazAqparat – Halyqaralyq qoǵamdastyq jikke bólinýshiliktiń kúsheıýi men geosaıası bóliný dáýirine qadam basqan kezeńde Qazaqstan negizgi jahandyq syn-qaterlerdi sheshý úshin kúsh jumyldyrý maqsatynda jańa dıalog alańy – Astana halyqaralyq forýmyn ótkizýdi qolǵa alady. Bul týraly QazAqparat Syrtqy ister mınıstrligi saıtyna silteme jasap habarlaıdy.

Forým Qazaqstan Prezıdenti Qasym-Jomart Toqaevtyń qoldaýymen 2023 jylǵy 8-9 maýsymda Astana qalasynda ótedi. Atalǵan forým klımattyń ózgerýine, azyq-túlik tapshylyǵyna jáne energetıkalyq qaýipsizdikke qatysty máselelerdi sheshý joldaryn qarastyrý maqsatynda shetel úkimetteriniń, halyqaralyq uıymdardyń, bıznes pen ǵylymı ortanyń joǵary laýazymdy delegattarynyń dıalogine arnalǵan alań bolmaq.

«Búginde biz búkil álem boıynsha tarıhı syn-qaterlermen betpe-bet kelip otyrmyz. Mundaı jaǵdaıdy ondaǵan nemese odan da kóp jyl boıy bastan ótkermedik. Bul syn-qaterler halyqaralyq qaýymdastyqqa buryn-sońdy bolmaǵan aýyrtpalyq ákelip, jańa bólinýshilik týdyryp, jahandaný men mýltılateralızm qaǵıdattaryna qarsy kelip jatyr.

Astana halyqaralyq forýmy álemdik júıeniń negizgi postýlaty retinde yntymaqtastyqqa basymdyq bere otyryp, osy syn-qaterlerge tótep berý úshin quryldy.

Shyǵys pen Batys arasyn baılanystyrýshy kópir qyzmetin atqaryp otyrǵan Qazaqstannyń syndarly halyqaralyq qatynastardy damytý boıynsha tereń tarıhy bar. Bul saıasat 2022 jyly eleýli synaqtan ótkenimen, óziniń ornyqtylyǵyn dáleldedi. Biz yntymaqtastyqtyń qundylyǵyn kórsete bildik.

Astana halyqaralyq forýmy arqyly jańa dıplomatııalyq, ekonomıkalyq jáne saıası joldardy aıqyndaı otyryp, aldymyzda turǵan ortaq syn-qaterlerdi birlese jeńý úshin jańa qatynas kópirlerin ornatyp, baılanystardy nyǵaıtamyz dep úmittenemiz», - dedi Qasym-Jomart Toqaev.

Astana halyqaralyq forýmynyń iske qosylýyna Astana ekonomıkalyq forýmynyń jetistigi sebep boldy. Onyń tujyrymdamasy syrtqy saıasat, qaýipsizdik jáne turaqtylyq, energetıka men klımat, sondaı-aq ekonomıka jáne qarjy sııaqty tórt negizgi jahandyq máseleni sheshýge arnalǵan. Atalǵan máseleler Forýmnyń «Dıalog arqyly syn-qaterlerdi sheshý: yntymaqtastyq, órkendeý jáne progress jolynda» mıssııasynyń ózegi bolady.

Forým baǵdarlamasyna negizgi baıandamalar, paneldik sessııalar, pikirtalastar jáne basqa da is-sharalar kiredi.

Іs-sharaǵa tirkelý rásimi ashyldy. Múddeli tulǵalar myna silteme boıynsha tirkele alady.

Foto: gov.kz