Jahandyq saýda júıesiniń bólshektený qaýpi bar - DSU basshysy

ASTANA. QazAqparat – Geosaıası shıelenis saldarynan álemdik ekonomıkanyń bólshektený qaýpi bar. Bul týraly Astana halyqaralyq forýmynda Dúnıejúzilik saýda uıymynyń bas dırektory Ngozı Okondjo-Iveala aıtty, dep habarlaıdy QazAqparat tilshisi.

«Biz geosaıası shıelenis saldaryn Dúnıejúzilik saýda uıymy (DSU) qyzmetinde sezinip otyrmyz. Bul rette mamandar bólshektený qaýpi jaıynda jıi aıta bastady. Jahandyq saýda júıesiniń bólshektený qaýpi bar. Meniń oıymsha, bul qazirgi kópjaqty saýda júıesi aldynda turǵan eń mańyzdy másele», – dedi Ngozı Okondjo-Iveala.

Onyń sózine qaraǵanda, osy syn-qater jahandyq jalpy ishki ónimniń tómendeýine ákelip soǵady.

«Saýda salasyndaǵy máselelerge óte saq bolǵan jón. Óıtkeni, álemdik saýda júıesi bólshektenip ketse, onyń saldary tym qaýipti. Eger álem eki saýda blogyna bólinse, bul naqty jahandyq jalpy ishki ónimniń 5% kóleminde joǵalýyn bildiredi degen boljam bar. Atap aıtqanda, bul kórsetkish Ekonomıkalyq yntymaqtastyq jáne damý uıymy (EYDU) elderiniń 2008–2009 jyldardaǵy qarjy daǵdarysy kezinde tap bolǵan shyǵynynan arttyq, ıaǵnı ol kezdegi shyǵyn 2% – 2,5%-yn qurady», - dedi DSU basshysy.