Jahandyq qalalar arasynda básekelestik órship tur - Baqyt Sultanov
«Búginde jahandyq qalalar arasynda ınvestıtsııa, talanttar, týrıster men kásipkerler úshin turaqty básekelestik júrip jatyr. Osynaý kúreste eń jaqsy múmkinshilik usynǵan ǵana jeńiske jetedi. Básekege qabilettilikti saqtaý úshin biz óńirimizde tirshiliktiń joǵary sapasyn qamtamasyz etýge tıistimiz. Óıtkeni, adamdar bıznesti jeńil júrgizip, qaýipsiz ári jaıly ómir súretin jerde jumys istegendi qalaıdy. QR Tuńǵysh Prezıdenti Nursultan Nazarbaevtyń dana ári kóregen saıasatynyń arqasynda qalamyz aıtarlyqtaı tabysqa qol jetkizip otyr. Damýdyń 20 jylynyń ishinde elorda bet-beınesi túbegeıli túrlendi jáne búginde ákimshilik, kommertsııalyq jáne qoǵamdyq keńistik úılesimde túıisken zamanaýı, tartymdy jáne qarqyndy damýshy megapolıst mártebesine saı keledi», - dedi elorda ákimi forýmnyń «Jahandyq jibek joly - qala merleriniń forýmy» sessııasy barysynda.
Onyń dereginshe, qazirgi ýaqytta elordada respýblıkanyń jalpy ishki óniminiń 11 paıyzy óndirilip, eldegi negizgi kapıtaldyń 10 paıyz ınvestıtsııasy qalyptasady. Osy jyldar ishinde qalanyń jalpy óńirlik ónimi shynaıy mánde 6 ese ósip, shamamen 17 mlrd dollarǵa jetti. Elorda ekonomıkasyna 9 trln teńge kapıtal salyndy. Investıtsııanyń jyldyq kólemi 55 esege artty. Bul 3 mlrd dollardan astam qarajatqa teń. Qazirgi ýaqytta Nur-Sultan qalasynyń ekonomıkasy ózine jetkilikti. Jalpy óńirlik óniminiń 55 paıyzy kásipkerlik sektor esebinen qalyptasady. Árbir úshinshi elordalyq kásipkerlikpen aınalysady. Soǵan sáıkes bıýdjetke salyqtyq túsimderdiń jartysynan kóbi kásipkerlerdiń úlesine tıesili.
«Árbir memlekettiń elordasy onyń «vızıttik kartasy» sanalady. Nur-Sultan qalasynyń elordalyq mártebesi onyń memlekettegi rólimen baılanysty kóptegen mindetterdi sheshýdi talap etedi. Biz barlyq ýaqytta da óńirlik yqpaldastyq úshin jemisti iskerlik yntymaqtastyqty jaqtaımyz. Tarıhı turǵyda Shyǵys pen Batystyń arasynda ekonomıkalyq kópir bolyp, tek saýda nemese kóliktik qyzmetti ǵana emes, sonymen birge keń aýqymdy gýmanıtarlyq jáne mádenı mıssııany oryndaǵan Uly Jibek jolyn órletýge umtylamyz», - dedi B.Sultanov.