Jahandyq apattardy adamnyń ózimshildigi týyndatyp otyr – Ál-Azhardyń Joǵarǵy ımamy

NUR-SULTAN. QazAqparat – Ál-Azhar ıslam ýnıversıtetiniń Joǵarǵy ımamy Ahmed at-Taıeb adamzatty jahandaǵy apattardyń sebebi týraly oılanýǵa úndedi, dep habarlaıdy QazAqparat tilshisi.

«Álemde koronavırýstyń qorqynyshtarynan qalpyna keltirýge ýaqyt bolmady. Óıtkeni basqa pandemııalar men apattar qaptap ketti. Bul tabıǵı, saıası jáne «ekonomıkalyq» apattardy adam ózimshildiginiń kesirinen óz qolymen jasap aldy. Ol apattar adamdardy teńseltip tastady. Qasıetti Quranda bul eki qubylys pen olardyń saldary týraly osydan shamamen 15 ǵasyr buryn aıtylǵan. Qasıetti kitapta adamnyń jer betindegi isterdiń bárine kıligýi týraly aıtylǵan», - dedi Ahmed ál-Taıeb Álemdik jáne dástúrli din kóshbasshylarynyń VII sezinde.

Din kóshbasshysy bul sózine mysal da keltirdi. «Bizdiń oıymyzsha, adamzat jahandyq jylyný, orman órtteri, qalalardy sý basý jáne sel júrý qaýpi, keıbir ózenderdiń tartylýy, kóptegen tiri tirshilik ıeleriniń qyrylýy sııaqty tabıǵat pen klımattyń kútpegen ózgeristerinen qorqynysh pen úreı sezinip jatqanyn kózimiz kórip otyr. Bul apattardy adam óziniń pıǵylynan, salǵyrttyǵy jáne basqalarǵa nemquraıly qaraýynan týyndatqanyn umytpaýymyz kerek», - dedi ımam.

Aıta ketý kerek, eki kúnge sozylatyn sezge 50 elden 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıasatkerler men qoǵam qaıratkerleri, halyqaralyq uıym músheleri kelgen.

Dinı forýmǵa arnaıy qonaq Rım Papasy Frantsıskten bólek Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıf jáne basqa da dinı jetekshiler, birqatar halyqaralyq uıymnyń ókilderi qatysýda.

Keshe keshke Prezıdent Qasym-Jomart Toqaev sezdiń arnaıy qonaǵy Rım Papasy Frantsıskti elorda áýejaıynan kútip aldy.

Keıinnen Qazaqstan Prezıdenti men Rım Papasy azamattyq qoǵam jáne dıplomatııalyq korpýs ókilderimen kezdesti.

Kezdesýde katolık shirkeýiniń basshysy Qazaqstannyń ólim jazasynan bas tartqanyna joǵary baǵa berip, Qazaqstan Konstıtýtsııasynyń nanym-senim bostandyǵynyń kepili ekenin atady.

Din kóshbasshysy Frantsısktiń elimizge memlekettik sapary Rım Papasy Ioann II Pavel Qazaqstanǵa 2001 jyly kelgennen keıin alǵash ret ótip jatyr. Búgin ol elordada messa ótkizedi. Oǵan 3 myńǵa jýyq adam qatysýda.

Foto: t.me/bort_01